اسلام آباد : آئی جی اسلام آباد محمد عامر ذوالفقار خان نے جے یو آئی ف کے ممکنہ دھرنے کے پیش نظر اسلام آباد پولیس کی چھٹیاں منسوخ کر دیں ، اہلکار انتہائی ایمرجنسی کی صورت میں ہی چھٹی کر سکیں گے۔
تفصیلات کے مطابق آئی جی اسلام آباد آئی جی اسلام آباد محمد عامر ذوالفقار خان نے جے یو آئی ف کے سربراہ مولانا فضل الرحمان کے ممکنہ دھرنے کے پیش نظر اسلام آباد پولیس کی چھٹیاں منسوخ کر دی ہے۔
آئی جی آفس کی جانب سے جاری کیے گئے نوٹیفیکیشن میں کہا گیا ہے کہ چھٹیاں منسوخ کرنے کا فیصلہ امن و امان کی صورتحال برقرار رکھنے کے لیے کیا گیا ہے۔ نوٹیفیکیشن کے مطابق اہلکار انتہائی ایمرجنسی کی صورت میں ہی چھٹی کر سکیں گے۔
دوسری جانب وفاقی پولیس نے ممکنہ احتجاج و دھرنے سے نمٹنے کے لئیے تیاریاں شروع کر دیں اور اسلام آباد پولیس نے دوسرے صوبوں سے بیس ہزار پولیس کی نفری طلب کر لی ہے۔
ترجمان پولیس کا کہنا ہے کہ رواں ماہ ممکنہ احتجاج سے نمٹنے کے لئے اہلکاروں کی ٹریننگ روزانہ کی بنیاد پر جاری ہے، دارلحکومت کا امن و امان خراب کرنے کی اجازت کسی بھی طور پر نہیں دی جائے گی ۔
مزید پڑھیں : جے یو آئی (ف) نے اسلام آباد کے ڈی چوک پر آزادی مارچ کی اجازت مانگ لی
اینٹی رائٹ یونٹ کا پولیس لائن ہیڈ کوارٹرز میں دو شفٹوں میں ٹریننگ سیشن جاری ہیں، اس حوالے سےجوانوں نے مجمع کو کنٹرول کرنے کی مشقیں کیں۔
پولیس افسران نے ہدایت کی ہے جلوس و دھرنے میں اپنی حفاظت یقینی بنائیں جبکہ تھانے میں صرف محرر، سنتری اور ڈپٹی افسر دستیاب ہوں گے۔
یاد رہے جمعیت علمائے اسلام (ف) کی جانب سے 27 اکتوبر کو ڈی چوک میں آزادی مارچ کیلئے درخواست دے دی گئی ہے۔
گذشتہ روز اسلام آباد ہائی کورٹ میں دھرنے کے خلاف درخواست پر پہلی سماعت ہوئی تھی، جس میں عدالت نے انتظامیہ کو امن و امان برقرار رکھنے کا حکم دیا اور کہا ضلعی مجسٹریٹ سے دھرنےکی اجازت نہیں لیں گے تو جے یو آئی کو اجازت نہیں ملے گی۔
مزید پڑھیں : آزادی مارچ کیخلاف درخواست، عدالت کا اسلام آباد انتظامیہ کو امن و امان برقرار رکھنے کا حکم
واضح رہے جے یو آئی (ف) نے 27 اکتوبر کو اسلام آباد کی طرف مارچ کا اعلان کیا ہے، مولانا فضل الرحمان کا کہنا تھا کہ مظاہروں کے ساتھ اسلام آباد کی طرف آزادی مارچ شروع ہوگا۔
جمعیت علمائے اسلام (ف) کے سربراہ مولانافضل الرحمان کا کہنا تھا کہ اسلام آباد جانا ہمارا آخری اور حتمی فیصلہ ہے، اب یہ جنگ حکومت کے خاتمے پر ہی ختم ہوگی، ہماری جنگ کا میدان پورا ملک ہوگا، ملک بھر سے انسانوں کا سیلاب آرہا ہے۔
