The news is by your side.

آئی جی اسلام آباد کا عمران خان کی حفاظت کے لیے 2 کروڑ ماہانہ اخراجات کا دعویٰ

اسلام آباد: آئی جی اسلام آباد کے عمران خان کی حفاظت کے لیے 2 کروڑ ماہانہ اخراجات کے دعوے پر پاکستان تحریک انصاف نے وزیر داخلہ سے عمران خان کی سیکیورٹی اخراجات کی تفصیلات مانگ لیں۔

تفصیلات کے مطابق پی ٹی آئی رہنما فواد چوہدری نے میڈیا سے گفتگو میں کہا کہ تحریک انصاف کا چیئرمین کی سیکیورٹی کے لیے بندوبست کا مراسلہ ریکارڈ پر ہے، وزیر داخلہ 266 اہل کاروں سمیت سیکیورٹی اخراجات کی باضابطہ تفصیلات دیں۔

انھوں نے کہا کہ بظاہر درجن بھر اہل کاروں اور مراسلوں کے علاوہ تو حکومت کا کوئی بندوبست نہیں، جب کہ پی ٹی آئی کا مراسلہ بھی ریکارڈ پر ہے۔

فواد چوہدری کا کہنا تھا ہر شہری کی طرح عمران خان کی حفاظت حکومت کی بنیادی ذمہ داری ہے، اور ریاستی وسائل پر جاہ و جلال کے سلسلے دراز کرنا شریفوں اور زرداریوں کی روایت ہے۔

انھوں نے کہا شریفوں نے جاتی امرا کے محل کی حفاظت پر پنجاب کے عوام کے 364 ملین اڑائے، کم و بیش 3 ہزار اہل کار جاتی امرا کے محل کی حفاظت پر لگائے گئے، 6،6 کیمپ آفسز قائم کر کے سالانہ اربوں لٹانا شریفوں اور زرداریوں کا وطیرہ ہے۔

فواد چوہدری نے مزید بتایا کہ عمران خان نے وزارتِ عظمیٰ میں قدم رکھتے ہی شاہانہ رواج کو نکال باہر پھینکا، اپنی تمام مدت اقتدار کے دوران عمران خان اپنی رہائش گاہ پر مقیم رہے، اپنے گھر کے گرد حفاظتی دیوار کے اخراجات بھی اپنی جیب سے ادا کیے۔

ان کا کہنا تھا کہ عمران خان نے غیر ملکی دوروں اور وزیر اعظم ہاؤس کے اخراجات میں بھی سالانہ کروڑوں بچائے۔

Comments

یہ بھی پڑھیں