کراچی : آئی جی سندھ غلام نبی میمن نے کراچی اور حیدرآباد کے 41 افسران و اہلکاروں کو معطل کردیا، جس میں کراچی کے 6ایس ایچ اوز اور ایک ڈی ایس پی شامل ہیں۔
تفصیلات کے مطابق آئی جی سندھ نے صوبائی ٹاسک فورس کی سفارش پر بڑی کارروائی کرتے ہوئے کراچی اور حیدرآباد کے41افسران و اہلکاروں کو معطل کردیا۔
معطل ہونے والے تمام افسران و اہلکاروں کا تبادلہ بلیک کمپنی کردیا گیا، معطل افسران میں کراچی کے 6ایس ایچ اوز، ایک ڈی ایس پی جبکہ حیدرآباد کے 2 ایس ایچ او ز اور ایک ڈی ایس پی شامل ہیں۔
ٹاسک فورس نے گٹکا ماوا میں ملوث افسران و اہلکاروں کی رپورٹ تیار کی گئی تھی ، معطل ایس ایچ اوز میں 3کا تعلق ڈسٹرکٹ سینٹرل سے ہے جبکہ 2ایس ایچ اوز کا تعلق ڈسٹرکٹ کیماڑی ،ایک کا تعلق ڈسٹرکٹ ویسٹ سے ہے۔
حیدرآباد سیکشن اے لطیف آباد اور حالی روڈ کے ایس ایچ اوز بھی معطل افسران میں شامل ہیں ، اس کے علاوہ ایس ایچ او شریف آباد غلام حسین پیر زادہ، بلال کالونی آفتاب عباسی، ایس ایچ او گلبرگ اشرف جوگی،پاک کالونی بھائی خان ، ایس ایچ او سعید آباد شاکر علی،ایس ایچ اواتحاد ٹاؤن ارباب غلام رسول بھی معطل ہونیوالوں میں سے ہیں۔
معطل ہونیوالوں میں اے وی سی سی اہلکار علی دوست سمیت 10پولیس کانسٹیبل، 8ہیڈ کانسٹیبل اور 4اے ایس آئی ، حیدرآباد میں4پولیس کانسٹیبل،3ہیڈ کانسٹیبل اور یک اے ایس آئی شامل ہیں۔
معطل تمام افسران واہلکاروں کو گارڈن پولیس ہیڈ کوارٹر رپورٹ کرنےکی ہدایت کردی گئی ہے۔
