پاکستان کے فاسٹ بولر احسان اللہ پی ایس ایل سیزن 10 میں پشاور زلمی کا حصہ بن گئے۔
پی ایس ایل سیزن 10 میں پشاور زلمی نے فاسٹ بولر احسان اللہ کو اپنے اسکواڈ میں شامل کرلیا، چیئرمین جاوید آفریدی نے انہیں ٹیم میں خوش آمد کہا۔
ڈائریکٹر کرکٹ پشاور زلمی محمد اکرم نے کہا کہ احسان اللہ دو ماہ سے ہمارے ساتھ موجود اور رابطے میں ہے، وہ پاکستان کا اثاثہ ہیں انہیں سپورٹ کریں گے۔
PSL 10- پی ایس ایل کی تمام خبریں
انہوں نے کہا کہ احسان اللہ کو پشاور زلمی نے سپلیمینٹری پک میں اسکواڈ میں شامل کیا ہے۔
واضح رہے کہ چند روز قبل پاکستان کے نوجوان فاسٹ بولر احسان اللہ کی پشاور زلمی کی کٹ پہنے تصویر سوشل میڈیا پر وائرل ہوگئی۔
احسان نے پی ایس ایل 2023 میں ملتان سلطانز کی جانب سے کھیلتے ہوئے 22 وکٹیں حاصل کی تھیں جس کے بعد مارچ 2023 میں پاکستان کے لیے ٹی 20 انٹرنیشنل میں ڈیبیو کیا۔
انہیں اپریل 2023 میں نیوزی لینڈ کے خلاف ون ڈے ڈیبیو کے دوران کہنی کی انجری ہوئی اور وہ کرکٹ سے دور ہوگئے۔
یہ پڑھیں: احسان اللہ نے پی ایس ایل کی کس ٹیم کی کٹ پہن لی؟ تصویر وائرل
جب وہ 2024 میں چیمپئنز ٹی کپ کھیلنے آئے تو ملتان سلطانز نے رواں سال کے شروع میں منعقدہ پی ایس ایل 10 کے ڈرافٹ میں انہیں منتخب نہیں کیا۔
جس کے بعد احسان اللہ نے ریٹائرمنٹ کا اعلان کردیا تاہم چند گھنٹے بعد ہی انہوں نے ریٹائرمنٹ واپس لے لی۔
بعدازاں انہوں نے ملتان سلطانز سے معذرت کرتے ہوئے کہا کہ وہ جب بھی انہیں بلائیں گے وہ حاضر ہوں گے، تاہم اب زلمی کی کٹ پہنے ان کی تصویر کی قیاس آرائیوں کو جنم دیا ہے۔
