اسلام آباد : وزیر داخلہ اعجاز شاہ نے کہا مقبوضہ کشمیر میں کرفیو ختم ہونے کے بعد مودی، کشمیریوں کا اصل امتحان ہوگا، جتنا وزیر اعظم عمران خان نے کشمیر کاز کے لیے کام کیا اتنا کسی رہنما نے نہیں کیا، عالمی برادری کو مسئلہِ کشمیر پر ردعمل دکھانا ہوگا۔
تفصیلات کے مطابق وزیر داخلہ اعجاز شاہ نے عرب میڈیا کو دیئے گئے انٹرویو میں کہا کہ بھارت زیر انتظام جموں اور لداخ میں مسلم آبادی کم ہے لہذا وہاں لاک ڈاؤن اتنا سخت نہیں ،مسلم اکثریتی کشمیر میں سخت پابندیاں اور لاک ڈاؤن ہے۔
وزیر داخلہ کا کہنا تھا کہ عالمی برادری کو مسئلہِ کشمیر پر ردعمل دکھانا ہو گا، جتنا وزیر اعظم عمران خان نے کشمیر کاز کے لیے کام کیا اتنا کسی رہنما نے نہیں کیا۔
اعجاز شاہ نے کہاکہ بھارتی جاسوس کلبھوشن یادو کو قونصلر رسائی دینے کے معاملے پر قدم عالمی عدالت انصاف کے فیصلے کے بعد اٹھایا گیا۔ اگر ہم کشمیر کی صورتحال کی وجہ سے کلبوشن کی قونصلر رسائی پر اپنا فیصلہ بدل لیتے تو ہم میں اور مودی میں کوئی فرق نہیں رہ جانا تھا۔
ان کا کہنا تھا کہ مودی حکومت کے پانچ اگست کے اقدامات کی وجہ سے اس فیصلے کو بدل نہیں سکتے، ہمیں ایک ایسی قوم کے طور پر کام کرنا ہے جو دیانت دار ہے۔
وزیر داخلہ نے مزید کہا کہ مقبوضہ کشمیر میں کرفیو ختم ہونے کے بعد مودی، کشمیریوں کا اصل امتحان ہوگا۔
