پاکستان کرکٹ ٹیم کے سابق آل راؤنڈر عماد وسیم نے بین الااقوامی کرکٹ میں واپسی کا اشارہ دے دیا۔
نجی ٹی وی چینل سے گفتگو کرتے ہوئے سابق آل راؤنڈر عماد وسیم نے مخصوص شرائط پر بین الاقوامی کرکٹ میں واپسی کے لیے اپنی رضامندی ظاہر کردی ہے۔
عماد وسیم نے ریٹائرمنٹ کے فیصلے پر کھل بات کی اور کہا کہ بین الاقوامی کرکٹ سے ریٹائرمنٹ کا فیصلہ درست تھا لیکن اگر پاکستان کو میری ضرورت ہوگی تو میں واپس آنے کو بھی تیار ہیں۔
عماد وسیم نے کہا کہ میں نے جو فیصلہ لیا وہ 100 فیصد درست تھا لیکن ہمیں یہ نہیں معلوم کہ پاکستان کو کب ضرورت ہو، اس کے لیے میں ریٹائرمنٹ واپس لے سکتا ہوں۔
عماد وسیم نے کہا کہ ٹیم انتظامیہ اگر ٹیم میں میرے رول سے متعلق وضاحت کردے تو میں آگے بڑھ کر اپنا فیصلہ واپس لینے کو تیار ہوں۔
انہوں نے مزید کہا میں چاہتا ہوں کہ پاکستان کرکٹ صحیح انداز اور صحیح امتزاج کے ساتھ کھیلے، ریٹائرمنٹ لینے میں کوئی حرج نہیں ہے، میں واقعی خوش ہوں، میں اب بھی پوری دنیا میں کرکٹ کھیل رہا ہوں۔
واضح رہے کہ آل راؤنڈر عماد وسیم نے نومبر 2023 میں ریٹائرمنٹ کا اعلان کیا تھا۔
