چیمپئنز ٹرافی کے لیے قومی ٹیم سے ڈراپ ہونے پر اوپنر بیٹر امام الحق نے معنی خیز پوسٹ شیئر کردی۔
سماجی رابطے کی ویب سائٹ ایکس پر اوپنر بیٹر امام الحق نے لکھا کہ ’نتیجہ میری توقع کے مطابق نہیں ہے لیکن سفر ابھی ختم نہیں ہوا یہی زندگی ہے۔
انہوں نے لکھا کہ سب کچھ یہی ہے کہ ہر مشکل کے ساتھ آگے بڑھا جائے اور خود کو مضبوط بنایا جائے، سب سے اہم صبر اور اللہ پر بھروسہ ہے۔
واضح رہے کہ امام الحق نے چیمپئنز ٹرافی کے لیے قومی ٹیم کے اعلان کے بعد سوشل میڈیا پر یہ پیغام لکھا۔
ٹیم کے اعلان سے قبل کہا جارہا تھا کہ صائم ایوب کی انجری کے بعد امام الحق کو 15 رکنی اسکواڈ میں منتخب کیا جاسکتا ہے لیکن ان کا نام اسکواڈ میں شامل نہیں۔
واضح رہے کہ پاکستان کے 15 رکنی اسکواڈ کا اعلان گزشتہ روز کیا گیا، ٹیم کی قیادت محمد رضوان کریں گے۔
پاکستان کے 15 رکنی اسکواڈ میں محمد رضوان، بیٹرز بابر اعظم، فخر زمان، کامران غلام، سعود شکیل، عثمان خان اور طیب طاہر شامل ہیں جبکہ آل راؤنڈرز میں فہیم اشرف، خوشدل شاہ اور سلمان علی آغا (نائب کپتان) اسکواڈ کا حصہ ہیں۔
بولرز میں اسپنر ابرار احمد اور فاسٹ بولرز حارث رؤف، محمد حسنین، نسیم شاہ اور شاہین شاہ آفریدی کو شامل کیا گیا ہے۔
