ہر کھلاڑی کو شوق ہوتا ہے کہ اس کے والدین کھیل کے میدان میں اپنے اولاد کی پرفارمنس دیکھیں لیکن پاکستان کرکٹ ٹیم کے اوپننگ بلے باز امام الحق خود اپنے والدین کو گراؤنڈ نہیں لاتے۔
جس طرح والدین اپنی اولاد کی ہر شعبہ زندگی میں کامیابی کے خواہشمند ہوتے ہیں اسی طرح اولاد بھی اپنی کامیابیوں کو والدین کو دکھانے کی خواہش رکھتی ہے۔ بات ہو اگر کھیل کے میدان کی تو کئی مواقع پر دیکھا گیا ہے کہ کھلاڑی اپنے والدین کو میدان میں لا کر اپنی کارکردگی دکھاتے ہیں لیکن قومی اوپننگ بیٹر امام الحق ایسا نہیں کرتے۔
پاکستان کی ایک روزہ اور ٹیسٹ ٹیم کے اہم رکن اوپنر امام الحق کیوں اپنے والدین کو گراؤنڈ نہیں لاتے اس کا اظہار انہوں نے کر ہی دیا۔
امام الحق جو ان دنوں افغانستان کے خلاف ایک روزہ سیریز کے لیے سری لنکا میں موجود ہیں وہاں میڈیا سے بات کرتے ہوئے کہا کہ میرے والدین نے آج تک گراؤنڈ میں مجھے کھیلتے نہیں دیکھا میری بھی خواہش ہوتی ہے کہ ان کے والدین گراؤنڈ میں آکر میچ دیکھیں اور ان کی کارکردگی کو سراہیں لیکن وہ ڈر کی وجہ سے انہیں اسٹیڈیم نہیں لاتے۔
قومی اوپننگ بلے باز نے کہا کہ یہ خوف اپنی کارکردگی کا نہیں بلکہ عام آڈیئنس کا ہے کہ کہیں وہ میرے والدین کے سامنے مجھے پرچی نہ کہہ دیں اگر ایسا ہوا تو بہت افسوس ہوگا اور اسی ڈر کی وجہ سے آج تک والدین کو گراؤنڈ میچ دکھانے نہیں لایا۔
واضح رہے کہ امام الحق سابق کپتان اور عالمی شہرت یافتہ بلے باز انضمام الحق کے بھتیجے ہیں۔ کیریئر کے آغاز میں ان پر اپنے چچا کی وجہ سے پرچی کی چھاپ لگی لیکن انہوں نے تسلسل کے ساتھ پرفارمنس دکھا کر اس منفی پروپیگنڈے کا منہ توڑ جواب دیا اور اپنی کارکردگی سے ٹیم کو کئی میچز جتوائے جس کے بعد وہ قومی ٹیم کی بیٹنگ میں ریڑھ کی ہڈی کی حیثیت رکھتے ہیں۔