اسلام آباد : حکومت نے آئی ایم ایف کی شرط پوری کرتے ہوئے مقامی سگریٹ پر ٹیکس میں اضافہ کردیا۔
تفصیلات کے مطابق وفاقی حکومت نے مقامی سگریٹ پر ٹیکس بڑھا دیا، فیڈرل بورڈ آف ریونیونےسگریٹ پر ایکسائز ڈیوٹی بڑھانے کا نوٹیفکیشن جاری کردیا ہے۔
نوٹیفکیشن میں بتایا گیا کہ مقامی 9 روپے سے زائد کی قیمت کی سگریٹ پر 16.5 روپے ایکسائز ڈیوٹی اور مقامی 9 روپے سے کم قیمت کی سگریٹ پر 5 روپے 5پیسے ایکسائز ڈیوٹی عائد کی گئی ہے۔
فیڈرل بورڈ آف ریونیو (ایف بی آر) نے کابینہ کی جانب سے فنانس بل کی منظوری کے بعد نوٹیفکیشن جاری کیا، جسے اب منظوری کے لیے (آج) پارلیمنٹ میں پیش کیا جائے گا۔
صدر مملکت ڈاکٹر عارف علوی کے اعتراضات کے بعد وفاقی حکومت نے فنانس بل پارلیمنٹ سے منظور کرانے کا فیصلہ کیا تھا۔
ذرائع نے اے آر وائی نیوز کو بتایا کہ فنانس بل (آج) قومی اسمبلی اور سینیٹ کے الگ الگ اجلاسوں کے دوران پیش کیا جائے گا۔
