اسلام آباد : وزیر خزانہ محمد اورنگزیب کا کہنا ہے کہ آئی ایم ایف وفد 24 فروری کو پاکستان آئے گا، جس کے بعد ایک سے ڈیڑھ ارب ڈالرز ملنے کی توقع ہے۔
تفصیلات کے مطابق وزیر خزانہ محمد اورنگزیب نے صحافیوں سے گفتگو کرتے ہوئے کہا کہ آئی ایم ایف وفد 24 فروری کو پاکستان آئے گا، آئی ایم ایف وفد کے ساتھ کلائمیٹ فنڈ پر بات چیت ہوگی۔
وزیر خزانہ کا کہنا تھا کہ ابتدائی طور پر وفد سے اسٹرکچرل امور پر گفتگو ہوگی، کلائمیٹ فنڈ کی مد میں ایک سے ڈیڑھ ارب ڈالرز ملنے کی توقع ہے۔
انھوں نے بتایا کہ قرض پروگرام کے تحت ششماہی جائزے کا مشن مارچ میں آئے گا، آئی ایم ایف پروگرام سے متعلق تمام امور درست ہیں، ایک مہینے کا کرنٹ اکاؤنٹ خسارہ منفی ہوا ہے اور سات مہینے کا کرنٹ اکاؤنٹ خسارہ مثبت ہے۔
وفاقی وزیر نے زور دیا معاشی شرح نمو کو احتیاط سے آگے بڑھانا ہوگا، بوم اینڈ بسٹ سائیکل میں دوبارہ نہیں جائیں گے ، اسٹرکچرل اصلاحات کے ذریعے معیشت کا ڈی این اے ٹھیک ہوگا۔
