اسلام آباد: عالمی مالیاتی فنڈ (آئی ایم ایف) حکومتی اقدامات سے مطمئن ہوگئی جس کے بعد نئے قرض پروگرام کی راہ ہموار ہوگئی۔
ذرائع وزارت خزانہ کے مطابق آئی ایم ایف شرائط کے تحت تیار بجٹ منظور ہوچکا ہے، بجٹ کی منظوری سے آئی ایم ایف کی ایک بڑی شرط پرعمل درآمد مکمل کیا گیا، آئی ایم ایف کی باقی شرائط پر عمل درآمد کا عمل جاری رکھا ہوا ہے۔
ذرائع وزارت خزانہ نے بتایا کہ نیپرا کے فیصلے کی روشنی میں بجلی کے بنیادی ٹیرف میں اضافے پر کام ہورہا ہے، جولائی میں بجلی کے بنیادی ٹیرف میں اضافے کا اطلاق کردیا جائے گا، بجلی کی ماہانہ اور سہہ ماہی ایڈجسٹمنٹس کا بروقت اطلاق کیا جارہا ہے، بجلی کے بنیادی ٹیرف میں اضافے کا اطلاق بھی بروقت کیا جائے گا۔
ذرائع نے بتایا کہ جولائی میں نئے قرض پروگرام کا معاہدہ طے پانے کا امکان ہے، نئے قرض پروگرام کا حجم 6 ارب سے 8 ارب ڈالرز ہوسکتا ہے ابھی تک نئے قرض پروگرام کے حجم کو حتمی شکل نہیں دی گئی آئی ایم ایف کے ساتھ نیا قرض پروگرام 3 سال کے لیے ہوگا۔
