واشنگٹن : بین الاقوامی مالیاتی فنڈ (آئی ایم ایف) پاکستان سے آئندہ معاہدے کیلئے تیار ہوگیا، 7ارب ڈالر کے پروگرام پر آمادگی ظاہر کردی۔
تفصیلات کے مطابق آئی ایم ایف پاکستان سے 7 ارب ڈالر کا معاہدہ کرنے پر آمادہ ہوگیا ہے، آئی ایم ایف نے37ماہ کے پروگرام پرآمادگی ظاہر کردی۔
آئی ایم ایف کے جاری اعلامیے میں کہا گیا ہے کہ نئے قرض پروگرام کی حتمی منظوری آئی ایم ایف کا ایگزیکٹو بورڈ دے گا۔
اعلامیے کے مطابق نیا قرض پروگرام پاکستان میں معاشی استحکام کا باعث بنے گا، گزشتہ ایک سال میں پاکستان میں مہنگائی میں کمی ہوئی۔
بین الاقوامی مالیاتی فنڈ (آئی ایم ایف) کا کہنا ہے کہ پاکستان کے زرمبادلہ کے ذخائر بہتر ہوئے، اس کے علاوہ پاکستان میں معاشی استحکام کو فروغ حاصل ہوا۔
آئی ایم ایف کے اعلامیہ میں مزید کہا گیا ہے کہ معاشی استحکام کے لیے پاکستان ٹیکس آمدنی بڑھائے گا، پاکستان میں ٹیکس آمدنی میں جی ڈی پی کا ڈیڑھ فیصد اضافہ رواں مالی سال ہوگا۔
اعلامیہ کے مطابق قرض پروگرام کے دوران جی ڈی پی میں ٹیکسوں کا حصہ3فیصد تک بڑھایا جائے گا، پاکستان میں ڈائریکٹ اوران ڈائریکٹ ٹیکسز میں منصفانہ اضافہ ہوگا۔
آئی ایم ایف کا کہنا ہے کہ پاکستان میں ٹیکس دہندگان کی تعداد میں اضافہ کیا جائے گا، ریٹیل سیکٹر میں بھی ٹیکس نیٹ بڑھایا جائے گا۔
پاکستان میں برآمدی شعبے سے بھی ٹیکس وصولیاں بہتر کی جائیں گی اور پاکستان میں زرعی شعبہ بھی ٹیکس نیٹ میں لایا جائے گا۔
اعلامیہ میں مزید کہا گیا ہے کہ ٹیکس آمدنی بڑھنے سے سماجی شعبے کیلئےزیادہ فنڈز میسر ہوں گے، ٹیکس بڑھنے سے تعلیم، صحت عامہ کیلئے زیادہ وسائل دستیاب ہوسکیں گے۔
