اسلام آباد : آئی ایم ایف نے کلائمیٹ فنانسنگ پر پاکستان سے مذاکرات میں الیکٹریکل گاڑیوں پر سیلز ٹیکس کی رعایت پر اعتراض اٹھادیا۔
تفصیلات کے مطابق کلائمیٹ فنانسنگ پر پاکستان سے مذاکرات میں الیکٹریکل گاڑیوں پر سیلزٹیکس کی رعایت پر آئی ایم ایف کا اعتراض سامنے آگیا۔
ذرائع نے بتایا کہ الیکٹرک وہیکل پالیسی میں ٹیکس کی مجوزہ رعایت مسترد کردی اور الیکٹریکل وہیکل کے پرزہ جات کی مقامی فروخت پر سیلزٹیکس میں رعایت کی مخالفت کی گئی۔
انٹرنیشنل مانیٹری فنڈ نے تجویز دی کہ نئی الیکٹریکل وہیکل پالیسی میں ٹیکس کی شرح معمول کے مطابق ہونی چاہیے۔
انٹرنیشنل مانیٹری فنڈ نے مطالبہ کیا کہ الیکٹریکل گاڑیوں کی تیاری کے خام مال پر بھی سیلزٹیکس کی رعایت نہ دی جائے اور لوکل سپلائی سمیت پرزوں کی فروخت پر سیلز ٹیکس چھوٹ نہ دی جائے، الیکٹریکل وہیکل پر آئندہ نئی ٹیکس چھوٹ نہیں دی جاسکتی۔
وزارت صنعت وپیداوار کی الیکٹریکل وہیکل مینوفیکچرنگ پر سیلز ٹیکس چھوٹ کی تجویز تھی، ذرائع نے بتایا کہ کلائمیٹ فنانسنگ پر مذاکرات کا آج تیسرا دور ہوگا۔
ذرائع نے کہا کہ الیکٹرک وہیکل کیلئے چارجنگ اسٹیشنز اور اوگرا ٹیرف ایڈجسٹمنٹ میکنزم پر مذاکرات شیڈول ہیں ، جس میں 40 چارجنگ اسٹیشنز کیلئے سائٹ انتخاب اور 2030 تک 3 ہزار چارجنگ اسٹیشنز کے ہدف پر بریفنگ دی جائے گی۔
بجٹری گیس سبسڈی ریفارمز پر بھی انٹرنیشنل مانیٹری فنڈ وفد کیساتھ مذاکرات ہوں گے۔
