اسلام آباد: آئی ایم ایف نے گزشتہ پروگرام کے بعد پاکستان میں ہونے والی مثبت تبدیلیاں بتا دیں، پاکستان میں پالیسیوں کے نفاذ سے 20 سالوں میں پہلی بار پرائمری سرپلس 0.9 فی صد ہو گیا۔
آئی ایم ایف کی رپورٹ کے مطابق گزشتہ 9 ماہ کا قرض پروگرام شروع ہوا تو پاکستان سخت مشکل میں تھا، پاکستان کو بھاری بیرونی فائنانسنگ درکار تھی اور ذخائر ختم ہو رہے تھے، پھر 9 ماہ کے اسٹینڈ بائے ایگریمنٹ کے تحت پاکستان نے پالیسیوں کا نفاذ کیا، جس سے 20 سالوں میں پہلی بار پرائمری سرپلس 0.9 فی صد ہوا۔
آئی ایم ایف کے مطابق 9 ماہ کے ایس بی اے کے بعد مہنگائی میں کمی کا رجحان برقرار رہا، سخت مالیاتی اور مانیٹری پالیسی سے مہنگائی 9.6 فی صد تک گر گئی، گزشتہ 9 ماہ کے پروگرام کے بعد سرکاری اور نجی انفلوز کی بحالی ہوئی، ان تمام مثبت تبدیلیوں نے پاکستان کی معیشت کو مستحکم کرنے میں مدد کی،۔
رپورٹ میں کہا گیا ہے کہ پالیسیوں کے نفاذ سے پاکستان کی شرح نمو 2.4 فی صد تک پہنچ گئی ہے، گزشتہ ایس بی اے کے باعث کرنٹ اکاؤنٹ خسارے میں بڑی گراوٹ آئی، مالی سال 2024 میں کرنٹ اکاؤنٹ خسارہ 665 ملین امریکی ڈالر رہ گیا، جب کہ مالی سال 2023 میں پاکستان کا کرنٹ اکاؤنٹ خسارہ 3.3 ارب ڈالر تھا۔
آئی ایم ایف کے مطابق جون 2024 کے آخر تک مجموعی ذخائر بڑھ کر 9.4 بلین ڈالر ہو گئے ہیں۔
