اسلام آباد: عالمی مالیاتی ادارے (آئی ایم ایف) نے پاکستان سے ترقیاتی بجٹ میں کفایت شعاری کی شرط رکھ دی۔
تفصیلات کے مطابق آئی ایم ایف نے ترقیاتی بجٹ میں کفایت شعاری کی شرط رکھ دی، ذرائع کا کہنا ہے کہ آئی ایم ایف رواں مالی سال نئے ترقیاتی پروجیکٹس کی فنڈنگ روکنے پر غور کررہا ہے۔
ذرائع کا بتانا ہے کہ آئی ایم ایف نے مطالبہ کیا کہ نگران حکومت نئے ترقیاتی پروجیکٹس کا اعلان نہ کرے، صرف پہلے سے جاری ترقیاتی پروجیکٹس کیلئے فنڈز مختص کیے جائیں، جو پروجیکٹس تکمیل کے قریب ہیں انہیں ترجیحی بنیادوں پر فنڈز دیں۔
ذرائع کا کہنا ہے کہ ترقیاتی فنڈز کو صرف پروجیکٹس مکمل کرنے پر خرچ کیا جائے، ترقیاتی پروجیکٹس کی ترجیحات ازسر نو متعین کی جائیں گی، آئی ایم ایف کو سیلاب سے متاثرہ اضلاع کی بحالی کیلئے فنڈز پر کوئی اعتراض نہیں۔
