اسلام آباد : وفاقی حکومت کی جانب سے آئی ایم ایف کی تمام تر شرائط پوری کرنے اور بجٹ پیش کرنے کے باوجود پاکستان کو قرض کی فراہمی کا معاملہ کھٹائی میں پڑگیا ہے۔
اس تمام صورتحال میں ایسا لگ رہا ہے کہ آئی ایم ایف کا یہ والا پروگرام تو ہاتھ سے گیا! اب اسحاق ڈار کے دعوے اور بیانات کا کیا بنے گا؟ پاکستان کو اب کہاں سے امید ہے؟
اس حوالے سے اے آر وائی نیوز کے پروگرام باخبر سویرا میں ممتاز ماہر معاشیات عابد سلہری نے اپنی گفتگو میں بہت سی باتوں انکشاف کیا۔
انہوں نے کہا کہ نویں جائزے کیلئے تو فی الحال کوئی پیش رفت ہوتی نظر نہیں آرہی 30 جون کو ٹائم بھی ختم ہورہا ہے تو یہ کہنا بجا ہوگا کہ آئی ایم ایف کا یہ والا پروگرام تو ہاتھ سے گیا۔
ایک سوال کے جواب میں ان کا کہنا تھا کہ اگلے مالی سال کی پہلی ششماہی میں دسمبر تک ہمیں سوا دس ارب ڈالر کے قرضے واپس کرنے ہیں، دوست ممالک کی طرف سے بھی رول اوور دینے کا موڈ نہیں لگ رہا۔
انہوں نے کہا کہ اس صورت حال میں کچھ اثاثے جو لیز پر رکھے جاسکتے ہیں اس سلسلے میں ابوظبی کا ایک گروپ 1.8 ملین ڈالر کی پیشکش کررہا ہے۔
ہماری اگلی حکمت علمی کیا ہونی چاہیے کے سوال پر انہوں نے جواب دیا کہ ہمیں آئی ایم ایف کے ساتھ بات چیت کے دروازے کھلے رکھنا ہوں گے تو اگلاپروگرام لینا کچھ آسان ہوگا۔
