ریاض: سعودی عرب میں رواں برس حج کے لیے آنے والے عازمین کی امیگریشن کارروائی صرف 20 منٹ میں مکمل کی جارہی ہے، جدہ کے ایئر پورٹ پر 15 سے زیادہ زبانیں جاننے والے اہلکار تعینات ہیں۔
اردو نیوز کے مطابق جدہ حج ٹرمنل حکام نے کہا ہے کہ عازمین حج کی امیگریشن کارروائی 20 منٹ میں مکمل کی جارہی ہے۔
جدہ کے کنگ عبدالعزیز انٹرنیشنل ایئرپورٹ پر مختلف ممالک سے 90 حج پروازیں پہنچیں جن سے آنے والے عازمین حج کی سفری کارروائی 20 منٹ میں مکمل کردی گئی۔
اس سے قبل محکمہ پاسپورٹ کے ڈائریکٹر جنرل سلیمان الیحییٰ نے حج ٹرمینل پر انتظامات کا جائزہ لینے کے لیے کنگ عبدالعزیز انٹرنیشنل ایئرپورٹ کا دورہ کیا تھا۔
الیحییٰ نے محکمہ پاسپورٹ کے اہلکاروں کو ہدایت کی تھی کہ وہ عازمین حج کو معیاری اور اعلیٰ درجے کی سہولیات فراہم کریں، ایئر پورٹ پر 15 سے زیادہ زبانیں جاننے والے اہلکار تعینات ہیں۔
وزارت حج و عمرہ کا کہنا ہے کہ اس سال صنعا ایئرپورٹ سے جدہ کے کنگ عبد العزیزانٹرنیشنل ایئرپورٹ آنے والے یمنی عازمین حج کا بھی خیر مقدم کیا جارہا ہے۔
