قومی اسمبلی کے 33 حلقوں میں 16 مارچ کو شیڈول ضمنی انتخابات میں پی ٹی آئی چیئرمین عمران خان نے خود الیکشن نہ لڑنے کا فیصلہ کیا ہے۔
اے آر وائی نیوز کے مطابق اسپیکر قومی اسمبلی کے گزشتہ ماہ پی ٹی آئی کے 113 اراکین اسمبلی کے استعفے تین مراحل میں منظور کیے تھے اور الیکشن کمیشن نے ان نشستوں کے خالی ہونے کا نوٹیفیکشین بھی جاری کرتے ہوئے 33 حلقوں میں 16 مارچ کو ضمنی الیکشن کرانے کا شیڈول جاری کیا تھا۔
الیکشن کمیشن کی جانب سے ضمنی انتخابات کے شیڈول جاری ہونے کے بعد پاکستان تحریک انصاف نے تمام 33 حلقوں سے پارٹی چیئرمین عمران خان کے امیدوار ہونے کا اعلان کرتے ہوئے کہا تھا کہ عمران خان تمام حلقوں سے امیدوار کے طور پر کھڑے ہوں گے۔
تاہم اب ان ضمنی انتخابات کے حوالے سے سابق وزیراعظم کا اہم فیصلہ سامنے آیا ہے اور ذرائع نے بتایا ہے کہ عمران خان قومی اسمبلی کے ضمنی انتخابات میں حصہ نہیں لیں گے۔
ان ضمنی الیکشن کے حوالے سے پی ڈی ایم پہلے ہی اختلافات کا شکار ہے۔ سربراہ پی ڈی ایم مولانا فضل الرحمٰن کی جانب سے ضمنی الیکشن نہ لڑنے کا اعلان کیا گیا تھا۔ تاہم پہلے پی ڈی ایم حکومت کی ایک اتحادی جماعت ایم کیو ایم نے ضمنی الیکشن میں کراچی کی نشستوں پر انتخابات لڑنے کا اعلان کیا۔
بعد ازاں پیپلز پارٹی بھی پی ڈی ایم سربراہ کے فیصلے سے منحرف ہوگئی اور اس نے بھی بائیکاٹ کے بجائے ضمنی الیکشن کے میدان میں اترنے کا فیصلہ کرتے ہوئے خواہشمند امیدواروں سے درخواستیں طلب کرلی ہیں۔
واضح رہے کہ عمران خان نے گزشتہ سال پی ٹی آئی کے اراکین کے استعفے منظور ہونے کے بعد خالی ہونے والی 7 نشستوں سے خود الیکشن لڑا تھا اور 6 نشستیں جیتنے میں کامیاب رہے تھے۔
