کراچی : محمکہ پولیس نے عدالتی احکامات پر عمل کرتے ہوئے اہم شخصیات سمیت ریٹائرڈ اورحاضر پولیس افسران کی حفاظت پر مامور اضافی پولیس اہلکار واپس لے لیے۔
اس حوالے سے ترجمان کراچی پولیس نے دفتر سے جاری ایک اعلامیے میں بتایا گیا ہے کہ سپریم کورٹ آف پاکستان کے احکامات کے تناظر میں مختلف سیاسی سماجی و دیگر اہم شخصیات سمیت ریٹائرڈ اور حاضر سروس پولیس افسران سے ان کی حفاظت پر مامور اضافی پولیس اہلکاروں کی واپسی کا عمل جاری ہے۔
ترجمان نے بتایا کہ اب تک 232 پولیس اہلکار جو کہ بطور اضافی نفری مذکورہ شخصیات اور پولیس افسران کے پاس سیکیورٹی فرائض پر تعینات تھے انہیں واپس اپنے اپنے یونٹس میں رپورٹ کرنے کے باقاعدہ احکامات جاری کردیئے گئے ہیں جبکہ اضافی نفری کی واپسی کے عمل کا باقاعدہ آغاز بھی ہوچکا ہے۔
ترجمان نے مزید بتایا کہ سیاسی رہنماؤں اور دیگرسماجی و مذہبی شخصیات کو سیکیورٹی کی فراہمی کے ضمن میں پراونشل ٹھریٹ اسسمنٹ کمیٹی قائم کی گئی ہے ۔
مذکورہ کمیٹی ان شخصیات کو نہ صرف سیکیورٹی کی فراہمی کا فیصلہ کرتی ہے بلکہ تمام ترسیکیورٹی بھی صوبائی کمیٹی کی سفارشات پر ہی مہیا کی جاتی ہے اس کے علاوہ صوبائی کمیٹی اپنی سفارشات پر وقتاً فوقتاً نظر ثانی بھی کرتی رہتی ہے۔
ترجمان کا کہنا تھا کہ مذکورہ کمیٹی محکمہ داخلہ سندھ، رینجرز سندھ اور محکمہ پولیس سندھ سمیت قانون نافذ کرنے والے دیگر اداروں کے نمائندگان پر مشتمل ہے۔
