اسلام آباد : وزیرخزانہ اسحاق ڈار کی بجٹ تقریر کے اہم نکات سامنے آگئے، جس کے مطابق غریب طبقات کو مہنگائی سے بچانے کے لیے ریلیف دیا جائے گا اور نان فائلرز پر ٹیکس کا ریٹ بڑھایا جائے گا۔
تفصیلات کے مطابق وزیرخزانہ اسحاق ڈار کی بجٹ تقریر کے اہم نکات سامنے آگئے ، ذرائع نے کہا ہے کہ بجٹ میں آئی ٹی ایکسپورٹ بڑھانے پر توجہ دی جائے گی اور ترسیلات زر بڑھا کر زرمبادلہ کے ذخائر بہتر بنائے جائیں گے۔
ذرائع کا کہنا تھا کہ ترقی و خوشحالی کیلئے مقامی صنعت کی حوصلہ افزائی کی جائے گی اور نوجوانوں کو روزگار کے مواقع دینے کے لیے کاروبار میں آسانیاں دی جائیں گی۔
غریب طبقات کو مہنگائی سے بچانے کے لیے ریلیف دیا جائے گا جبکہ نان فائلرز پر ٹیکس کا ریٹ بڑھایا جائے گا تاکہ وہ ٹیکس کے دائرہ میں آسکیں۔
آئی ٹی کے شعبے میں سیلز ٹیکس گوشوارے جمع کرانے کی چھوٹ دی جائے گی تاہم آئی ٹی ایکسپورٹ کے لیے رعایتی 0.25 فیصد ٹیکس کی شرح برقرار رکھنے کا فیصلہ کیا گیا ہے۔
آئی ٹی کی ایکسپورٹ میں بیرونی سرمایہ کاروں کے لیے رعایت دینے کی تجویز اور بیرونی سرمایہ کاروں کیلئےسیلز ٹیکس کی شرح 15 سے کم کرکے 5 فیصد کرنے کی تجویز ہے۔
اس کے علاوہ ترسیلات زر پاکستان میں لانے کے لیے سہولتیں دینے کا فیصلہ کیا گیا ہے، بینکوں کے ذریعے ایک لاکھ ڈالر سالانہ لانے کی سہولت دی جائے گی۔
