کراچی : فیروزآباد پولیس کے ہاتھوں گرفتار ہونے والے تین ملزمان نے دوران تفتیش اہم انکشافات کیے ہیں، کورنگی پولیس نے اسٹریٹ کرائم میں ملوث 3ملزمان کو گرفتار کرلیا۔
تفصیلات کے مطابق دو روز پہلے فیروزآباد سے گرفتار3ملزمان مزید 72وارداتوں میں ملوث نکلے، تینوں ملزمان کو دو روز قبل فیروزآباد میں مقابلے کے بعد گرفتار کیا گیا تھا۔
پولیس کے مطابق ملزمان کو اب تک 16افراد شناخت کرچکے ہیں، سی سی ٹی وی فوٹیج میں ملزمان کو کار سوار کو لوٹتے ہوئے دیکھا جاسکتا ہے ملزمان نے مزاحمت پر گاڑی کے شیشہ پر پستول ماری۔
ملزمان کار سوار سے 3لاکھ روپے چھین کر فرار ہوگئے تھے، پولیس حکام کا کہنا ہے کہ گرفتار ملزمان سے نقدی،3 پستول اور دو موٹر سائیکلیں برآمد ہوئی ہیں۔
دوسری کارروائی میں کورنگی پولیس نے اسٹریٹ کرائم میں ملوث 3ملزمان کو گرفتار کرلیا، ملزمان ڈیفنس، درخشاں شریف آباد اور ابراہیم حیدری میں وارداتوں میں ملوث ہیں۔
ملزمان کار سوار موٹرسائیکل سواروں سے نقدی اور موبائل فون چھینتے تھے، اس کے علاوہ گرفتار ملزمان اے ٹی ایم سے رقم نکالنے والے شہریوں کو بھی لوٹتے تھے۔
