متحدہ عرب امارات کی وزارت صحت نے کم آمدنی والے تارکین وطن کو سستی دواؤں کی فراہمی کے لیے معاہدہ کیا ہے۔
غیرملکی میڈیا کی خبر کے مطابق متحدہ عرب امارات کی وزارت صحت اور روک تھام، جانسن اینڈ جانسن کی جانسن فارماسیوٹیکل کمپنیوں اور صحت کی دیکھ بھال سے متعلق ایک عالمی مشاورتی فرم (AXIOS)نے حال میں مفاہمت کی یادداشت (ایم او یو) کے ضمیمے پر دستخط کیے ہیں۔
اس اقدام کا مقصد غیربیمہ شدہ اور کم آمدنی والے تارکین وطن کو سستی ادویہ فراہم کرنا ہے جن کے بیمہ درج ذیل بیماریوں جیسے پلمونری آرٹیریل، ہائی بلڈپریشر، ایک سے زیادہ مائیلوما، ایکٹیو السرٹیو کولائٹس اور سوریاٹک آرتھرائٹس کے علاج کے اخراجات کو پورا نہیں کرپارہی ہیں۔
ایم او یو پر پہلی بار دسمبر 2018 میں دستخط کیے گئے تھے اور تقریباً 712 اہل مریضوں نے اس سے فائدہ اٹھایا تھا۔ اپریل 2019 میں مذکورہ بالا بیماریوں کا شکار مریضوں کو نئی ادویہ فراہم کرنے کے لیے پروگرام کی توسیع پر دستخط کیے گئے ہیں۔
یہ معاہدہ وزارت صحت، جانسن اور (AXIOS) کے جدید ادویہ تک رسائی کو بہتر بنانے کے عزم کا حصہ ہے، بالخصوص کم آمدنی والے غیرملکیوں کو جو اپنے علاج کے اخراجات برداشت کرنے کی سکت نہیں رکھتے۔
