کراچی: معروف پاکستانی اداکار عمران عباس کا کہنا ہے کہ وہ اپنے حوالے سے پھیلنے والی جعلی خبروں سے سخت پریشانی میں مبتلا ہیں، وہ لوگوں سے اپیل کرتے ہیں کہ ذمہ دار شہری ہونے کے ناطے غلط خبریں پھیلانے والے سوشل میڈیا پلیٹ فارمزکو رپورٹ کریں۔
تفصیلات کے مطابق معروف اداکار عمران عباس نے اے آر وائی نیوز کے مارننگ شو باخبر سویرا میں خصوصی گفتگو کرتے ہوئے بتایا کہ وہ فیس بک پر جعلی خبروں کی وجہ سے نہایت پریشان ہیں۔
عمران کا کہنا تھا کہ صرف 1 ماہ میں 4 بار ان کی شادی کی خبر مختلف سوشل میڈیا صفحات کی زینت بنی، ایک بار ان کی طلاق کی جھوٹی خبر پھیلائی گئی جس سے وہ سخت پریشانی کا شکار ہوئے۔
انہوں نے کہا کہ اداکارہ اشنا شاہ کے ساتھ ان کی شادی کی خبر نے نہ صرف انہیں بلکہ اشنا کو بھی سخت پریشان کردیا، ان کی اشنا سے 3 سال پہلے ملاقات ہوئی تھی۔ یہ صورتحال خواتین کے لیے خاص طور پر زیادہ اذیت ناک ہے جنہیں مختلف سوالات کا سامنا کرنا پڑجاتا ہے۔
عمران عباس نے بتایا کہ اس سے پہلے ان کے ایکسیڈنٹ اور موت کی جھوٹی خبر پھیلائی گئی تھی، ان کی بہن ملک سے باہر رہتی ہیں جب انہیں اس خبر کا علم ہوا تو سوچیں ان پر کیا گزری ہوگی۔
اداکار نے اپیل کی کہ فیس بک پیجز اور یوٹیوبرز اپنے لائیکس اور فالوورز کی تعداد بڑھانے کے لیے اوچھی حرکتیں نہ کریں، لوگوں سے بھی اپیل ہے کہ اس طرح کی جھوٹی خبریں پھیلانے والے پلیٹ فارمز کو ان سبسکرائب، ان فالو کریں اور انہیں رپورٹ کریں۔
