پاکستان کے معروف اداکار عمران اشرف کو اداکاروں کا اداکار کہا جاتا ہے۔ ان کا کیریئر مختلف اور ہٹ کر کردار ادا کرنے سے بنا۔ چاہے وہ خواجہ سرا کا کردار ہو یا بھولے کا انوکھا کردار جس نے ناظرین کے دل جیت لیے۔
اس کے علاوہ عمران اشرف کی جانب سے ادا کیے گئے حال ہی میں دو کردار ” آدم ” اور” موسیٰ ” نے اُن کے اداکاری کے کیریئر کو چار چاند لگا دیئے ہیں۔
عمران اشرف آج کل شہرت کی بلندیوں کو چھو رہے ہیں، ان کی جانب سے سوشل میڈیا پر شیئر کیا گیا ایک قول انٹرنیٹ صارفین میں کافی مقبولیت حاصل کررہا ہے۔
عمران اشرف کی جانب سے سوشل میڈیا اکاؤنٹ انسٹا گرام پر اپنا لکھا ہوا ایک قول شیئر کیا گیا ہے جسے پڑھ کر اُن کے مداح سمیت شوبز انڈسٹری بھی اُن کے لکھنے کی صلاحیتوں کی تعریف کر رہی ہے۔
عمران اشرف نے اپنی انسٹا پوسٹ میں لکھا ہے کہ "ایک نیکی کم سے کم 70 بن کر واپس آتی ہے، احسان وہیں کا وہیں رہتا ہے، پیروں کی مٹی نہیں چھوڑتا، وزنی ہوتا ہے نا، نیکی کرنی چاہیے، احسان نہیں۔”
واضح رہے کہ عمران اشرف کے مداح نہ صرف باکستان بلکہ دنیا بھر میں موجود ہیں۔ پاکستان کے منجھے ہوئے اداکار عمران اشرف نہ صرف بہترین اداکار ہیں بلکہ خوبصورت تحریرں لکھنے والے رائٹر بھی ہیں۔
