کراچی: گورنر سندھ عمران اسمعٰیل کا کہنا ہے کہ کچرا اٹھانا یا شہر کی صفائی سندھ حکومت اور میئر کا کام ہے، پوری دنیا میں لوکل گورنمنٹ کی ذمہ داری ہے شہر صاف کرے۔
تفصیلات کے مطابق گورنر سندھ عمران اسمعٰیل کا کہنا تھا کہ کچرا اٹھانا یا شہر کی صفائی سندھ حکومت اور میئر کا کام ہے، کچرا اٹھانے کا کام انہی سے لیا جائے تو بہتر ہے۔
گورنر سندھ نے کہا کہ پوری دنیا میں لوکل گورنمنٹ کی ذمہ داری ہے شہر صاف کرے، فضل الرحمٰن عرصے سے کوشش کر رہے ہیں نظام کو پٹڑی سے اتاریں، فضل الرحمٰن کی اپنی حریف جماعتیں ان کے ساتھ آنے سے گھبرا رہی ہیں۔
انہوں نے کہا کہ مولانا کو سوچنا چاہیئے کیا کشمیر معاملے کو نقصان پہنچائیں گے، موجودہ حکومت 5 سال کہیں نہیں جارہی۔ سڑکوں پر اس لیے نکل رہے ہیں جو کرپشن کر رہے ہیں ان کو نہ پکڑیں۔
گورنر سندھ کا کہنا تھا کہ تحریک انصاف کی سندھ میں حکومت نہیں، بہت جلد چیزیں بہتر ہوتے ہوئے نظر آئیں گی۔ مولانا فضل الرحمٰن کا دھرنا کامیاب نہیں ہوگا۔ جب تک سنگل اتھارٹی قائم نہیں ہوگی وہاں ڈلیور کرنا مشکل ہوجاتا ہے۔
