لاہور: لاہور ہائیکورٹ نے بانی پاکستان تحریک انصاف (پی ٹی آئی) کی 9 مئی جلاؤ گھیراؤ کے 8 مقدمات میں ضمانت کی درخواستوں پر کارروائی 19 جون 2025 تک ملتوی کر دی۔
لاہور ہائیکورٹ کے جسٹس شہباز رضوی کی سربراہی میں دو رکنی بینچ نے عمران خان کی ضمانت کی درخواستوں پر سماعت کی، بانی پی ٹی آئی کی بہن علیمہ خانم اور پنجاب اسمبلی میں اپوزیشن لیڈر احمد خان بچھر بھی پیش ہوئے۔
دوران سماعت سرکاری وکیل نے دلائل دیے۔ دو رکنی بینچ نے سوال کیا کہ لاہور اور راولپنڈی کے واقعات میں مختلف لوگ شامل تھے، ان مقدمات میں کن کن کی ضمانت ہو چکی ہے؟
یہ بھی پڑھیں: 9 مئی کیس میں پی ٹی آئی ایم این اے کو فوری گرفتار کرنے کا حکم
عدالت نے عمران خان کے وکیل بیرسٹر سلمان صفدر کو ہدایت کی کہ وہ بھی ریکارڈ حاصل کر کے معاونت کریں۔ عدالت نے قرار دیا کہ جلدی میں کوئی فیصلہ نہیں کرنا چاہتے۔
سرکاری وکیل نے بتایا کہ حملوں کے دوران پولیس کے سامان کا 4 کروڑ کا نقصان کیا گیا جبکہ جناح ہاؤس پر حملے میں 52 کروڑ سے زائد کا نقصان ہوا، عمران خان نے پولی گرافک اور فوٹو گرامیٹک ٹیسٹ کروانے سے انکار کر دیا تھا اور ٹرائل کورٹ کے احکامات کو بھی نظر انداز کیا۔
پراسیکیوٹر نے استدعا کی کہ ٹرائل کورٹ کی ہدایات نہ ماننے پر ضمانت کی درخواستیں خارج کی جائیں۔ سرکاری وکیل نے دلائل میں یہ نکتہ اٹھایا کہ جو جرم ہوا ہے اعانت جرم کرنے والے بھی وہی سزا ملے گی۔
سرکاری وکیل کے مطابق عمران خان اقتدار سے باہر آنے کے بعد سے لوگوں کو اداروں کے خلاف اکسا رہے تھے، گواہوں نے بھی شہادت دی کہ سازش بانی پی ٹی آئی نے تیار کی۔
