راولپنڈی: ذرائع نے کہا ہے کہ اڈیالہ جیل میں سابق ڈپٹی سپرنٹنڈنٹ محمد اکرم کا ایک نیٹ ورک پکڑا گیا ہے، جو بانی پی ٹی آئی عمران خان کے لیے سہولت کاری کرتا تھا۔
ذرائع کے مطابق بانی پی ٹی آئی کے لیے سہولت کاری پر سابق ڈپٹی سپرنٹنڈنٹ اڈیالہ جیل محمد اکرم کا پورا نیٹ ورک پکڑا گیا ہے، معطل ڈپٹی سپرنٹنڈنٹ محمد اکرم سے حاصل معلومات پر مزید 6 ملازمین سے پوچھ گچھ شروع کی جائے گی۔
ذرائع کے مطابق جیل کے مزید 2 افسران سے پوچھ گچھ شروع کر دی گئی ہے، ان میں اڈیالہ جیل کے اسسٹنٹ ناظم، سابق ڈپٹی سپرنٹنڈنٹ ظفر شامل ہیں، دونوں افسران سابق ڈپٹی سپرنٹنڈنٹ اڈیالہ جیل اکرم کے قریبی تھے۔
اڈیالہ جیل کے اسسٹنٹ سپرنٹنڈنٹ بلال احمد سے بھی پوچھ گچھ کی گئی ہے، محمد اکرم کے 2 اردلی، 3 وارڈر اور ہیڈ وارڈر سے پوچھ گچھ کی جائے گی، تمام ملازمین محمد اکرم کے قریبی تصور کیے جاتے ہیں۔
تین یورپی ممالک کے نمبرز پر بنائے گئے واٹس ایپ کے لیے استعمال ہونے والے موبائل فون کے شواہد بھی مل چکے ہیں، محمد اکرم پر بانی پی ٹی آئی عمران خان کے لیے پیغام رسانی اور سہولت کاری کا الزام ہے۔
