لاہور: وفاقی وزیر پیٹرولیم مصدق ملک نے کہا ہے کہ پی ٹی آئی سے بات چیت خوش آئند ہے مگر مذاکرات میں عمران خان کے جرائم کا ایجنڈا شامل نہیں ہوگا۔
وفاقی وزیر پیٹرولیم مصدق ملک نے لاہور میں میڈیا سے گفتگو کرتے ہوئے کہا کہ بانی پی ٹی آئی عمران خان پر فوجداری نوعیت کے مقدمات ہیں، جرائم کا گفتگو و شنید سے کیا تعلق؟ مذاکرات معاشی، سیاسی، جمہوری اور پارلیمانی بحالی کیلئے ہوں گے۔
مصدق ملک نے دو ٹوک الفاظ میں کہا کہ پی ٹی آئی سے بات چیت میں میں بانی عمران خان کے جرائم کا ایجنڈا شامل نہیں ہوگا، بات چیت ہوگی تو کوئی راستہ نکلےگا، اب آپ آئے ہیں تو سر آنکھوں پر، آئیں بیٹھ کر تعمیری بات کریں، ہماری دشمنی نہیں ہم سیاسی حریف ہیں۔
انہوں نے کہا کہ ملک کو سیاسی تناؤ کی نذر نہ کریں، پی ٹی آئی سے مذاکرات خوش آئند ہیں، معیشت کی بات کریں ملک کو آگے بڑھانے کی بات کریں، ہم تو پہلے بھی آپ سے بات کیلئے تیار تھے، مسائل کا حل مذاکرات میں ہی ہے۔
مصدق ملک کا کہنا تھا کہ سزائیں ہو رہی ہیں ٹرائل ہو رہے ہیں، شواہد سامنے آ گئے فرد جرم عائد ہو چکی ہے، 9 مئی واقعات میں ملوث لوگوں کو سزائیں ہورہی ہیں، واقعات کے شواہد پیش کردیے گئے کیوں کہ سزائیں ہورہی ہیں۔
وفاقی وزیر کا کہنا تھا کہ مسائل کا حل مذاکرات کے ذریعے ہی ممکن ہے، مجرمانہ سرگرمیوں کا مذاکرات سے کیا تعلق؟ کبھی ہم پریشان ہوتے ہیں 2018 میں کبھی وہ 2024 میں، آئیں کوئی حل نکالیں، سعد رفیق اور خرم دستگیر الیکشن ہار گئے لیکن دھاندلی کا رونا نہیں رویا، انہوں نے کہا الیکشن میں دھاندلی ہوئی، ہم نے کہا آپ آئیں حکومت بنائیں۔
’’ ہم نے کہا حکومت بنا کر خود دیکھیں کون سا فارم 45 یا 47 ہے تلاش کریں، امریکی قراردادیں ن لیگ یا پی پی کے خلاف نہیں پاکستان کے خلاف پاس کروائی گئیں، 30 سال سے پاکستان کے ایٹمی پروگرام کے خلاف مہم چلانے والے کو آپ نے لابسٹ ہائر کیا ‘‘
وزیر پٹرولیم نے محکموں میں کرپشن کا اعتراف کرتے ہوئے کہا کہ ے بجلی و پانی میں کرپشن ہوتی ہے اس کو دور کرنے کی کوشش کررہے ہیں۔
