وفاقی حکومت نے چیئرمین پاکستان تحریک انصاف عمران خان اور ان کی اہلیہ بشریٰ بی بی کا نام نو فلائی لسٹ میں شامل کر دیا۔
اے آر وائی نیوز کے مطابق سابق وزیر اعظم اور سابق خاتون اول سمیت 80 سے زائد افراد کے نام نو فلائی لسٹ میں شامل کیے گئے۔ ان افراد کے بیرون ملک سفر کرنے پر پابندی ہوگی۔
لسٹ میں شامل افراد میں مراد سعید، ملیکہ بخاری، فواد چوہدری، حماد اظہر، قاسم سوری، اسد قیصر، یاسمین راشد، میاں اسلم اقبال سمیت دیگر رہنما شامل ہیں۔
عمران خان ،بشریٰ بی بی سمیت 80 سے زائد افراد کے نام نو فلائی لسٹ میں شامل#ARYNews #ImranKhan pic.twitter.com/9nQD4Us4PB
— ARY NEWS (@ARYNEWSOFFICIAL) May 25, 2023
گزشتہ روز اسلام آباد کی انسداد دہشتگردی عدالت نے عمران خان کو 8 مقدمات میں شامل تفتیش کرنے پر تفصیلی فیصلہ جاری کیا جس میں کہا گیا کہ پراسیکیوٹرکے مطابق جے آئی ٹی نے عمران خان کو تفتیش میں معاونت کیلیے نوٹسز جاری کیے، پراسیکیورٹر کے مطابق متعدد بار جے آئی ٹی نوٹسز کے باوجود وہ شامل تفتیش نہیں ہوئے۔
عدالتی فیصلے میں کہا گیا کہ وکیل ملزم کے مطابق سکیورٹی خدشات کے باعث دی گئی تاریخ پر پیش نہیں ہوئے، جے آئی ٹی عمران خان کو زمان پارک میں شامل تفتیش کر لے، وکیل ملزم کے مطابق اس سے قبل بھی جے آئی ٹی نے زمان پارک میں عمران خان سے تفتیش کی، عمران خان سے تفتیش کیلیے جگہ کا تعین کرنے پر عدالتی معاونت درکار نہیں۔
فیصلے میں کہا گیا کہ عدالت کی جانب سے تفتیش کیلیے جگہ کا تعین کرنا عدالتی مداخلت بھی ہو سکتی، قانون کو مدنظر رکھتے ہوئے تفتیش کی جگہ کا تعین فریقین کو باہمی رضا مندی سے دیکھنا ہوگا، امید ہے آئندہ تاریخ سے قبل عمران خان کو جے آئی ٹی شامل تفتیش کر لے گی، فریقین باہمی رضا مندی سے عمران خان کا بیان ریکارڈ کرنے کے طریقے کار کا تعین کرنے پر آزاد ہیں، فریقین عمران خان کی درخواست ضمانت قبل ازگرفتاری پر دلائل کیلیے 8 جون کو عدالت پیش ہوں۔