اسلام آباد: پاکستان تحریک انصاف کے چیئرمین عمران خان نے تقریب حلف برداری غیر ملکی شخصیات کو مدعو نہ کرنے کا فیصلہ کیا ہے۔
تفصیلات کے مطابق نئے وزیر اعظم کی تقریب حلف برداری کے معاملے پر عمران خان نے غیر ملکی شخصیات کو مدعو نہ کرنے کا فیصلہ کیا ہے۔
رہنما پی ٹی آئی فواد چوہدری نے کہا کہ عمران خان کے صرف چند دوستوں کو بیرون ملک سے مدعو کیا جائے گا، بیرون ملک سے کسی بھی شخصیت کو دعوت نہیں دی جائے گی۔
فواد چوہدری کا کہنا تھا کہ عمران خان نے تقریب سادگی سے منعقد کرنے کی ہدایت کی، عمران خان سادگی سے وزارت عظمیٰ کا حلف اٹھائیں گے، تقریب سے کسی قسم کے تعیش یا تکلف کا اظہار نہیں کیا جائے گا۔
انھوں نے مزید کہا کہ ایوان صدرمیں تقریب مکمل طور پر قومی تقریب ہوگی۔
گذشتہ روز رہنما تحریک انصاف کا کہنا تھا کہ حلف برداری میں سربراہان مملکت بلانے کا فیصلہ نہیں کیا، نوازشریف نےحلف برداری میں کسی سربراہ کو نہیں بلایا، عوام سنہرے دور کے لیے تیاری کرلیں۔
مزید پڑھیں : عمران کی حلف برداری کو مختصر رکھنے کا فیصلہ
یاد رہے کہ تحریک انصاف کے چیئرمین اور پاکستان کے ممکنہ وزیراعظم عمران خان نے حلف برداری کی تقریب مختصر رکھنے کا فیصلہ کیا ہے۔
عمران کان کی تقریب حلف برداری کی تقریب 13 اگست کو ہونے کا امکان ہے، جس میں شرکت کرنے کے لیے سرحد پار کھلاڑیوں نے بھی اپنی خواہش کا اظہار کیا ہے۔
خیال رہے کہ عمران خان نے ڈی چوک پر حلف اٹھانے کی تجویز مسترد کردی، جس کے بعد سیکیورٹی رسک کی وجہ سے حلف برداری ایوان صدر میں ہوگی۔
واضح رہے کہ پی ٹی آئی چیئرمین نے پشاور میں خیبر پختونخوا کے اراکین پارلیمنٹ سے خطاب کرتے ہوئے کہا تھا ’میں 11 اگست کو وزارتِ عظمیٰ کا حلف لوں گا۔‘
