میانوالی: پاکستان تحریک انصاف کے چیئرمین عمران خان نے میانوالی میں مدر چائلڈ اسپتال کا افتتاح کردیا، عمران خان کا کہنا تھا کہ ان کی حکومت میں شروع کیے گئے ہیلتھ کارڈ سے 29 لاکھ لوگ فائدہ اٹھا چکے ہیں۔
تفصیلات کے مطابق پاکستان تحریک انصاف کے چیئرمین عمران خان نے میانوالی میں مدر چائلڈ اسپتال کا افتتاح کردیا، اس موقع پر عمران خان نے میڈیا سے گفتگو بھی کی۔
سابق وزیر اعظم کا کہنا تھا کہ ڈلیوری کے دوران سب سے زیادہ خواتین کی اموات پاکستان میں ہوتی ہیں، اپنی حکومت کے ساڑھے 3 سال میں سب سے زیادہ خوشی ہیلتھ کارڈ کی تھی۔
انہوں نے کہا کہ اب تک ہیلتھ انشورنس پر 30 ارب روپے خرچ ہو چکے ہیں۔
عمران خان کا کہنا تھا کہ آج پورا خیبر پختونخواہ ہیلتھ کارڈ سے کور ہے، کسی بھی نجی اسپتال سے 10 لاکھ روپے تک مفت علاج کروایا جا سکتا ہے۔
انہوں نے کہا کہ افسوس ہے ہماری حکومت گئی تو ہیلتھ کارڈ پر وفاق کی توجہ نہیں ہے، وفاقی حکومت ہیلتھ کارڈ کو فنڈ نہیں کر رہی، ہیلتھ کارڈ آنے کے بعد لوگوں نے اسپتال بنانا شروع کر دیے تھے۔
سابق وزیر اعظم کا مزید کہنا تھا کہ پوری کوشش کر رہے ہیں ہیلتھ کارڈ سے پورا پنجاب کور کریں، ہیلتھ کارڈ سے 29 لاکھ لوگ فائدہ اٹھا چکے ہیں۔
