لاہور : چیئرمین پی ٹی آئی عمران خان کا کہنا ہے کہ منصفانہ الیکشن کے سوا کوئی بات نہیں ہوسکتی، حکومت افراتفری پھیلا کر الیکشن ملتوی کرانا چاہتی ہے۔
تفصیلات کے مطابق چیئرمین تحریک انصاف عمران خان نے جرمن ٹی وی کو انٹرویو دیتے ہوئے کہا کہ ہم صرف آزادانہ اور منصفانہ انتخابات چاہتے ہیں، اس کے علاوہ کوئی بات چیت نہیں ہوسکتی۔
عمران خان کا کہنا تھا کہ اس وقت پاکستان میں سیاسی افراتفری کا ماحول ہے، سپریم کورٹ نے بھی 30 اپریل کو انتخابات کرانے کاحکم دیا۔
چیئرمین پی ٹی آئی نے کہا کہ یہ خوفزدہ ہیں کہ ہم انتخابات جیت جائیں گے، اس لئے حکومت افراتفری پھیلا کر الیکشن ملتوی کرانا چاہتی ہے۔
انھوں نے خبروں کی تردید کی کہ میں اور میری پارٹی سے کوئی بھی شخص عسکری قیادت سے ملنے کی کوشش نہیں کر رہا، افواہوں میں کوئی صداقت نہیں۔
عمران خان نے مزید کہا کہ ہم سمجھتے ہیں مسئلے سے نکلنے کا حل صرف شفاف انتخابات ہیں، ملک اس لئے سیاسی اور معاشی بحران کا شکار ہے کیونکہ موجودہ حکومت ناکام ہوچکی ہے۔
