اسلام آباد: وزیر مملکت انسداد منشیات وسیفران شہر یار خان آفریدی نے کہا ہے کہ وزیراعظم عمران خان اقوام متحدہ کی جنرل اسمبلی میں پاکستان کی نمائندگی اور کشمیریوں کے حقوق کی وکالت کررہے ہیں۔
اپنے ایک بیان میں شہریار آفریدی کا کہنا تھا کہ سیاسی نظریات سے بالاتر ہو کر اتحاد کی ضرورت ہے، حق خودارادیت کی جدوجہد میں پاکستان کشمیریوں کے ساتھ کھڑا ہے۔
وزیر مملکت نے کہا کہ اقوام متحدہ کی جنرل اسمبلی میں ریاستوں کے سربراہ اپنے ممالک کی نمائندگی کررہے ہیں اور اپنے ملک کے مفاد میں اور خطے کو درپیش مسائل کو عالمی برادری کے سامنے اٹھا رہے ہیں جو ان کی ریاست اور خطے کے بہترین مفاد میں ہیں۔
انہوں نے مزید کہا کہ وزیراعظم عمران خان جنرل اسمبلی میں پاکستان کی نمائندگی کر رہے ہیں اور کشمیریوں کے حقوق کی وکالت کر رہے ہیں۔
وفاقی حکومت کے اعلان پر آج ملک بھر میں یوم یکجہتی کشمیر منایا جائے گا
خیال رہے کہ وفاقی حکومت کے اعلان پر (آج) جمعہ کو ملک بھر میں یوم یکجہتی کشمیر منایا جائےگا جبکہ وزیر اعظم عمران خان اقوام متحدہ میں اپنے خطاب میں پوری دنیا کے سامنے کشمیر کا معاملہ اٹھائیں گے۔
وزیر داخلہ اعجاز احمد شاہ نے ملک بھر میں یوم یکجہتی کشمیر کے حوالے سے قوم سے اپیل کی کہ وہ (آج) اپنے جذبات کا بھر پور اظہار کریں اور مقبوضہ جموں و کشمیر میں جاری انسانی حقوق کی سنگین خلاف ورزیوں کے خلاف بھر پور آواز اٹھائیں۔
