لاہور : چیئرمین پی ٹی آئی عمران خان کا حفاظتی ضمانت کے معاملے عدالت میں پیش ہونے کاامکان ہے ، سیکیورٹی کیلئے گاڑیاں زمان پارک پہنچ گئیں ہیں۔
تفصیلات کے مطابق لاہور ہائی کورٹ میں حفاظتی ضمانت کے معاملے پر چیئرمین پی ٹی آئی عمران خان عدالت میں پیش ہونے کاامکان ہے۔
سیکیورٹی کیلئے گاڑیاں زمان پارک پہنچ گئیں ، عمران خان کی روانگی کیلئے جیمرگاڑی بھی زمان پارک پہنچ گئی جبکہ پولیس اہلکار بھی گاڑیوں کے ہمراہ پہنچ گئے ہیں۔
عمران خان کی روانگی کی صورت میں رکاوٹ بننے والے بینرز ہٹادیےگئے تاہم معاملے پر عمران خان کی قانونی ٹیم اور سینئر رہنماؤں کے ساتھ مشاورت جاری ہے۔
لاہورہائیکورٹ میں عمران خان کی حفاظتی ضمانت پر سماعت 4بجےتک ملتوی کی گئی ہے۔
اس سے قبل صبح لاہور ہائی کورٹ میں پی ٹی آئی عمران خان کی حفاظتی ضمانت پر سماعت ہوئی توعمران خان کے وکیل اظہرصدیق ایڈووکیٹ عدالت میں پیش ہوئے اور بتایا کہ عمران خان کی سیکیورٹی کےمسائل ہیں، پوری کوشش ہے کہ عمران خان پیش ہو جائیں، دیکھتےہیں عمران خان پیش ہوپاتےہیں یانہیں۔
اظہرصدیق ایڈووکیٹ نے استدعا کی تھی کہ اس معاملے پر ہمیں تھوڑی مہلت دی جائے، جس پر عدالت نے سماعت 12:30 بجے تک ملتوی کردی تھی۔
گزشتہ روز سماعت میں عمران خان کےوکیل نے کہا تھا کہ صحت کے مسائل کی وجہ سے عمران خان عدالت نہیں آپا رہے ، جس پر عدالت نے ریمارکس دیے تھے کہ آپ عمران خان کواسٹریچرپر لے کرآجائیں یا بیان حلفی دیں کہ صبح عمران خان کو لے آئیں گے۔
