پاکستان تحریک انصاف کے بانی عمران خان کا جلسہ ملتوی کرنے اور سیکیورٹی ذرائع کے بیان پر ردعمل سامنے آگیا۔
تفصیلات کے مطابق پاکستان تحریک انصاف (پی ٹی آئی) کے بانی نے اڈیالہ جیل کے کمرہ عدالت میں میڈیا سے غیر رسمی گفتگو کرتے ہوئے سیکیورٹی ذرائع کے بیان پر ردرعمل میں کہا کہ ’’میں ہوتا کون ہوں، میں ملک کی سب سے بڑی جماعت کا سربراہ ہوں، بڑی جماعت کا سربراہ ہوں اسی لیے فیض حمید کے اوپن ٹرائل کا مطالبہ کررہا ہوں ‘‘۔
اسلام آباد میں جلسہ ملتوی کرنے پر بانی پی ٹی آئی عمران خان نے کہا کہ معلومات دی گئی دینی جماعتیں احتجاج پر ہیں انتشار پھیلنے کا خدشہ ہے، اعظم سواتی اور بیرسٹر گوہر کو بلا کر ملاقات کی اور جلسہ ملتوی کیا، اگر ایسا نہ کرتا تو خدشہ تھا ایک اور نیا 9 مئی بنا کر پی ٹی آئی کے گلے ڈال دیا جاتا۔
بانی پی ٹی آئی نے کہا کہ آخری مرتبہ جلسہ ملتوی کیا، انہوں نے 8 ستمبر کا این او سی بھی جاری کیا، 8 ستمبر کو کسی نے رکاوٹ ڈالنے کی کوشش کی تو وہ خود ذمہ دار ہونگے۔
عمران خان نے کہا کہ حکومت کی ایک طرف چیف جسٹس کی مدت ملازمت میں توسیع کی گیم ہے، دوسری جانب عدالت میں سنیارٹی کو متاثر کرنے کی پلاننگ کی جارہی ہے، حکومت کا مقصد ہے سپریم کورٹ میں کسی اور کو سامنے لاکر کھڑا کیا جاسکے۔
بانی پی ٹی آئی کا کہنا تھا کہ ن لیگ کو جب خدشہ ہوتا ہے ہماری اسٹیبلشمنٹ سے بات ہورہی ہے انہیں 9 مئی یاد آتا ہے، میں کبھی نہیں چاہوں گا کہ ملک میں انتشار ہو۔
