راولپنڈی: اڈیالہ جیل میں قید بانی پاکستان تحریک انصاف (پی ٹی آئی) کا طبی معائنہ شوکت خانم اسپتال کے ڈاکٹر عاصم نے مکمل کر لیا۔
بانی پی ٹی آئی کے وکلا نے 8 اگست کو ان کے طبی معائنے کی درخواست کی تھی۔ عدالت نے سابق وزیر اعظم کا طبی معائنہ کرنے اور رپورٹ جمع کروانے کا حکم دے رکھا ہے۔
یاد رہے کہ مارچ میں ذاتی معالج ڈاکٹر ثمینہ نیازی نے بانی پی ٹی آئی کے دانتوں کا معائنہ مکمل کر کے رپورٹ ان کی بہن علیمہ خان کو پیش کی تھی۔
سابق وزیر اعظم کی ذاتی معالج ڈاکٹر ثمینہ نیازی اڈیالہ جیل پہنچی تھیں اور ان کے دانتوں کا معائنہ کیا تھا۔ بانی کے وکلا خالد یوسف چوہدری اور شیراز رانجھا بھی اڈیالہ جیل پہنچے تھے۔۔
وکیل خالد یوسف نے بتایا تھا کہ بانی کے دانتوں کا معائنہ مکمل کر لیا گیا، عدالتی احکامات کی روشنی میں ان کے دانتوں کا معائنہ کیا گیا۔
وکیل کا کہنا تھا کہ مجموعی طور پر بانی کی صحت ٹھیک ہے، انہوں نے صحت سے متعلق بات کرنے کا اختیار علیمہ خان کو دیا ہے، ان کو جیل سے اسپتال منتقل کرنے کا فیصلہ علیمہ خان کریں گی، جیل سپرنٹنڈنٹ نے بڑی عزت کے ساتھ جیل میں جانے دیا، ذاتی معالجہ کے ساتھ سرکاری ڈاکٹرز بھی جیل میں موجود تھے۔
