اسلام آباد : سربراہ سنی اتحاد کونسل صاحبزادہ حامد رضا نے عمران خان کیخلاف مذہبی منافرت کو ہوا دینے کی شدید مذمت کی۔
تفصیلات کے مطابق چیئرمین تحریک انصاف عمران خان سے سربراہ سنی اتحاد کونسل صاحبزادہ حامد رضا کی خصوصی ملاقات ہوئی۔
ملاقات میں باہمی دلچسپی کے امور،سیاسی صورتحال ودیگر اہم معاملات پر تفصیلی تبادلہ خیال کیا گیا۔
صاحبزادہ حامد رضا نے عمران خان کیخلاف مذہبی منافرت کو ہوا دینے کی شدید مذمت کرتے ہوئے کہا کہ مجرموں اور کرپٹ کرداروں پرمشتمل حکمران اتحاد مذہبی انتشار چاہتا ہے۔
سربراہ سنی اتحاد کونسل کا کہنا تھا کہ چیئرمین تحریک انصاف کی خدمات بے مثال اور قابل تحسین ہیں، سیاست میں مسلسل شکست سے دوچار گروہ اوچھے ہتھکنڈوں پر اتر آیا۔
انھوں نے کہا حکمران اتحاد کو متنبہ کرتے ہیں کہ ایسی کوششوں کوکامیاب نہیں ہونے دیں گے ، ان کی نالائقی اور نااہلیوں سے ملک پہلے ہی معاشی بدحالی کی دلدل میں ہے، عمران خان کےاتحادی ہیں اور حقیقی آزادی کی تحریک میں ساتھ دیتےرہیں گے۔
چیئرمین پی ٹی آئی عمران خان نے صاحبزادہ حامد رضا اور سنی اتحاد کونسل کا حمایت پر شکریہ ادا کیا۔
