لاہور: انسداد دہشتگردی عدالت نے اڈیالہ جیل میں قید بانی پاکستان تحریک انصاف (پی ٹی آئی) کے پولی گرافک اور فوٹو گرامیٹک ٹیسٹ کیلیے پولیس کی درخواست پر فیصلہ سنا دیا۔
بانی پی ٹی آئی عمران خان کا پولی گرافک اور فوٹو گرامیٹک ٹیسٹ کروانے کے کیس میں عدالت نے پولیس کی درخواست مسترد کر دی۔
انسداد دہشتگردی عدالت کے جج منظر علی گل نے درخواست پر اپنے فیصلے میں کہا کہ دو بار پولیس کو ٹیسٹ کروانے کی مہلت دی، ملزم کے دو بار انکار کے بعد تیسرا موقع دیا جانا محض وقت کا ضیاع ہوگا، لاہور:پولیس ملزم کا پولی گرافک اور فوٹو گرامیٹک ٹیسٹ نہیں کروا سکی۔
یہ بھی پڑھیں: بانی پی ٹی آئی کے پولی گرافک ٹیسٹ کروانے سے انکار پر عظمیٰ بخاری برہم
عدالت نے کہا کہ عدالت پہلے ہی ملزم اور تفتیشی افسر کو دو مواقع دے چکی ہے، عدالت نے ملزم کو اپنے آپ کو بے گناہ ثابت کرنے کیلیے دو چانس دیے، ملزم کی ضد کی وجہ سے اس نے مواقع ضائع کر دیے۔
انہوں نے کہا کہ ٹیسٹ کروانے کیلیے مزید موقع کی ضرورت نہیں ہے، ملزم کے انکار کے بعد تفتیش کیسے آگے بڑھے گی؟
عدالت نے تفتیشی افسر کو ہر قانونی طریقہ سے تفتیش مکمل کرنے کا حکم دیتے ہوئے کہا کہ یہ اپنی نوعیت کا پہلا کیس ہے کہ ملزم اپنی بے گناہی ثابت کرنے سے انکاری ہے۔
15 مئی کو انسداد دہشتگردی عدالت نے عمران خان کے خلاف درخواست منظور کرتے ہوئے پولی گرافک اور فوٹو گرامیٹک ٹیسٹ کروانے کا حکم دیا تھا۔
عدالتی فیصلے میں کہا گیا تھا کہ عمران کان کے پولی گرافک اور فوٹو گرامیٹک ٹیسٹ کروائے جائیں، عدالت نے 12 مقدمات میں ان کے ٹیسٹوں کی اجازت دی تھی۔
تاہم اڈیالہ جیل میں قید عمران خان نے تین مرتبہ ٹیسٹ کروانے سے انکار کیا جس پر پولیس نے دوبارہ انسداد دہشتگردی عدالت سے رجوع کیا تھا۔
