اسلام آباد : پاکستان تحریک انصاف کے چیئرمین عمران خان کے حالیہ بیان پر مسلم لیگ نون اور پاکستان پیپلزپارٹی کی جانب سے ردعمل کا اظہار کیا گیا ہے، جس میں عمران خان کو شدید تنقید کا نشانہ بنایا گیا ہے۔
اس حوالے سے وزیراطلاعات مریم اورنگزیب نے کہا کہ عمران خان اب تم روؤ یا چیخو تم سے کوئی سمجھوتہ کرنے کو تیار نہیں ہے کیونکہ فارن ایجنٹ گھڑی چور سے کوئی سمجھوتہ نہیں کرنا چاہتا تم کو صرف این آر او چاہیے۔
مریم اورنگزیب نے کہا کہ تم آرمی چیف سے کیوں ملنا چاہتے ہو؟ سمجھوتہ اس لئے کیونکہ ہیروں، اور 190ملین پاؤنڈ کا جواب نہ دینا پڑے، یہ سمجھوتہ نہیں بلکہ این آراو لینے کیلیے منتیں ہیں۔
ترجمان پیپلزپارٹی فیصل کریم کنڈی نے بھی عمران خان کے خطاب پر اپنے ردعمل میں انہیں کڑی تنقید کا نشانہ بناتے ہوئے کہا کہ عمران اپنے دورمیں مچائی جانے والی تباہی پر پردہ ڈالنے کی کوشش کررہے ہیں۔
فیصل کریم کنڈی نے کہا کہ کہاں ہیں وہ200ارب ڈالر جس کا تم نے قوم سے وعدہ کیا تھا؟ تم اقتدار میں لائے گئے تو ملک کو کوفہ بنادیا، ملک کو جب اتحاد اور اتفاق رائے کی ضرورت پڑی تم نے اس کو سبوتاژ کیا۔
ترجمان پیپلزپارٹی کا کہنا تھا کہ عمران خان نے نیب کے ذریعے ملک کی معیشت کے بخیئے ادھیڑے، تم نے وفاق میں اپنی حکومت ختم نہیں کی تمہیں عدم اعتماد سے نکالا گیا تھا، سیاستدان قومی معاملات میں مل کر بیٹھتے ہیں لیکن افسوس تم سیاستدان نہیں ہو۔
مزید پڑھیں : مجھ پر حملہ کروانے والے کو معاف کرنے کیلیے تیار ہوں، عمران خان
واضح رہے کہ زمان پارک لاہور سے ویڈیو لنک کے ذریعے اپنے کارکنوں سے خطاب میں عمران خان نے کہا ہے کہ مجھے پتا ہے کس نے مجھ پر حملہ کرایا میں اسے معاف کرنے کو تیار ہوں۔ ان کا مزید کہنا تھا کہ سب سے بات کرنے اور سب سے سمجھوتہ کرنے کو تیار ہوں، آگے جو حالات ہیں سب کو مل کر اس کا مقابلہ کرنا پڑے گا، نیلسن منڈیلا نے بھی سب کو معاف کر دیا تھا۔
