پاکستان تحریک انصاف کے بانی عمران خان کی ہمشیرہ علیمہ خان نے الزام عائد کیا ہے کہ پی ٹی آئی کی موجودہ قیادت بانی پی ٹی آئی کو جیل سے باہر نکلوانا نہیں چاہتی۔
اے آر وائی نیوز کے مطابق علیمہ خان نے اسلام آباد میں میڈیا سے گفتگو میں آج اسلام آباد میں ہونے والا پی ٹی آئی کا جلسہ منسوخ ہونے پر شدید برہمی کا اظہار کرتے ہوئے کہا کہ اعظم سواتی کس کے کہنے پر صبح، صبح عمران خان سے ملنے چلے گئے اور کس کے کہنے پر انہوں نے بانی پی ٹی آئی کو جلسہ ملتوی کرنے کا پیغام پہنچایا۔
عمران خان کی ہمشیرہ نے سوال اٹھایا کہ صبح ساڑھے سات بجے اڈیالہ جیل میں بانی پی ٹی آئی سے ملاقات کیسے ممکن ہو سکتی ہے؟ کسی کے کہنے پر ہی ان لوگوں نے پارٹی سربراہ سے جلسہ منسوخ کرایا ہے۔
انہوں نے کہا کہ یہ الزام بھی عائد کیا کہ تحریک انصاف کی موجودہ لیڈر شپ عمران خان کو جیل سے باہر نکالنے کا کوئی ارادہ نہیں رکھتی۔ یہ فیصلے خود کرتے اور نام بانی پی ٹی آئی کا لیتے ہیں۔
علیمہ خان نے کہا کہ جب پارٹی چیئرمین باہر بیٹھا ہے تو انہوں نے جلسے کا فیصلہ کیوں نہیں کیا؟ انہیں کارکنان کا سامنا کرنے کی ہمت نہیں۔
واضح رہے کہ پاکستان تحریک انصاف کا آج اسلام آباد میں جلسہ ہونا تھا جو چند گھنٹے قبل منسوخ کر دیا گیا اور پارٹی قیادت نے بتایا کہ جلسہ بانی پی ٹی آئی عمران خان کی ہدایت پر ملتوی کیا گیا ہے۔ تاہم جلسہ منسوخ ہونے کے بعد عمران خان کی ہمشیرہ کی جانب سے سخت ردعمل سامنے آیا ہے۔
