لاہور: چیئرمین پی ٹی آئی عمران خان پیشی کے لیے لاہور ہائیکورٹ پہنچ گئے، عدالت نے انھیں سوا دو بجے طلب کر رکھا ہے۔
تفصیلات کے مطابق چیئرمین پی ٹی آئی عمران خان حفاظتی ضمانت کیلئے لاہور ہائیکورٹ پہنچ گئے، اس موقع پر کارکنوں کی بڑی تعداد عمران خان کے ہمراہ تھی۔
عمران خان کوبلٹ پروف شیلڈ کے سائےمیں گاڑی سے اتارکرکمرہ عدالت لایاگیا، ان کی سیکیورٹی ٹیم نے انہیں حفاظتی حصار میں لیکر گاڑی سے اتارا۔
اس سے قبل عمران خان کی گاڑی ہائیکورٹ کے گیٹ نمبر ایک پر پہنچی تو سکیورٹی گارڈ کی جانب سے گیٹ کھولنے سے انکار کردیا گیا اور کہا انتظامیہ سے گیٹ کھولنے کی اجازت نہیں ملی۔
عدالت نے حفاظتی ضمانت کی درخواست پر عمران خان کو سوا دو بجے طلب کر رکھا ہے، عمران خان نے تھانہ گولڑہ اور سی ٹی ڈی اسلام آباد مقدمےمیں درخواست دی تھی۔
جسٹس شہاز رضوی اور جسثس فاروق حیدر پر مشتمل 2 رکنی بنچ سماعت کرے گا۔
یاد رہے چیئرمین عمران خان کی جانب سے حفاظتی ضمانت کی درخواستیں لاہور ہائی کورٹ میں دائر کیں تھیں۔
تھانہ گولڑہ اور سی ٹی ڈی کے مقدمات میں حفاظتی ضمانت کی درخواست دائر کی گئی، جس میں مؤقف اپنایا گیا کہ عدالتوں میں پیش ہونا چاہتا ہوں مگر گرفتاری کا خدشہ ہے، استدعا ہے کہ متعلقہ عدالت سے رجوع کرنے کے لیے حفاظتی ضمانت منظور کی جائے۔
