راولپنڈی : بانی پی ٹی آئی نے علی امین گنڈا پور کو پی ٹی آئی خیبرپختونخوا کی صدارت سے ہٹا دیا۔
تفصیلات کے مطابق علی امین گنڈاپور کو پی ٹی آئی خیبرپختونخواکی صدارت سے ہٹا دیا گیا، سیکرٹری جنرل سلمان اکرم راجہ نے بتایا کہ علی امین گنڈاپوراحسن طریقے سے ذمہ داریاں نبھا رہے ہیں، بانی پی ٹی آئی نے گنڈا پور کی خواہش پر فیصلہ کیا اور جنید اکبر کو صدر مقرر کردیا۔
سلمان اکرم راجہ کا کہنا تھا کہ عمران خان نے کہا 28 جنوری سے قبل پی ٹی آئی مذاکراتی کمیٹی سے ملاقات کرائی جائے، ملاقات کے بعد مذاکرات سے متعلق دیکھتے ہیں لیکن جوڈیشل کمیشن کےمطالبے سے پیچھے نہیں ہٹیں گے۔
انھوں نے بتایا کہ پنجاب میں پارٹی منظم کرنے سے متعلق مزید لوگوں کواہم ذمہ داریاں دی جائیں گی ، عالیہ حمزہ کو بھی پنجاب میں اہم ذمہ داریاں دی جائیں گی۔
سیکرٹری جنرل نے کہا کہ بانی پی ٹی آئی نے چیف جسٹس پاکستان کے نام اوپن لیٹر لکھا ہے، ہمارا مطالبہ ہے 9 مئی اور 26 نومبر پر جوڈیشل کمیشن بنایا جائے۔
سلمان اکرم نے بتایا کہ بانی نے کہا یہ نہیں ہوسکتا تو ہم نے کہا پھریہ ملک حجانی کیفیت میں رہے گا، بلوچستان میں گمشدہ لوگوں کا مسئلہ اٹھائیں گے ، کوئی نہ سمجھے کہ ہم پیچھے ہٹنے والے ہیں۔
