کراچی : تحریک انصاف کے چیئرمین عمران خان کی جانب سے کی جانب سے ایدھی فاؤنڈیشن کے روح رواں عبدالستارایدھی کی صحت یابی کے لیے نیک تمناؤں کے اظہار کے ساتھ گلدستہ بھیجا گیا ہے۔
پی ٹی آئی سندھ کے رہنما حلیم عادل شیخ اور ثمرعلی خان نے عبدالستار ایدھی کوعمران خان ک جانب سے پھولوں کا گلدستہ پیش کیا۔
تفصیلات کے مطابق پاکستان تحریک انصاف کے چیئرمین عمران خان کی جانب سے سماجی رہنما عبدالستار ایدھی کی خیریت دریافت کرنے کے لیے حلیم عادل شیخ ،ایم پی اے ثمر علی خان ،افتخار احمد اور دیگر نے کھارادرپرموجود ان کی رہائش گاہ پر جاکر ملاقات کی جہاں انہوں نے چیئرمین عمران خان کی جانب سے عبدالستار ایدھی کی عیادت کرنے کے ساتھ انہیں پھولوں کا گلدستہ بھی پیش کیا
اس موقع پرحلیم عادل شیخ اور ایم اپی اے ثمر علی خان کا میڈیا سے گفتگو میں کہنا تھا کہ تحریک انصاف سمجھتی ہے کہ عبدالستار ایدھی اس قوم کا سرمایہ ہیں اور ان کی زندگی ملک اور قوم کے لیے مشعل راہ ہے،انہوں نے کہا کہ عبدالستار ایدھی جیسے اس ملک میں آٹھ دس افراد اور ہوتے تو اس ملک کی حالت زار اس طرح نہ ہوتی ۔
انہوں نے کہا کہ چیئرمین عمران خان سمیت پوری تحریک انصاف کو ان کی صحت یابی کی بہت فکر ہے کیونکہ ہم جانتے ہیں کہ عبدالستار ایدھی کی زندگی دکھی قوم کے لیے بہت ضروری ہے۔
انہوں نے مزید کہا کہ عبدالستار ایدھی کی فلاحی و سماجی خدمات کا جاری رہنا اس ملک پر کسی احسان سے کم نہیں ہے ،انہوں نے اس ملک کی خدمت عوام کے تعاون سے کرنا گوارا کیا مگر کسی بھی حکومت کے آگے ہاتھ نہیں پھیلائے۔
