پشاور: پاکستان تحریکِ انصاف کے چیئرمین عمران خان نے کہا ہے کہ وہ 11 اگست کو وزراتِ عظمیٰ کا حلف اٹھائیں گے۔
تفصیلات کے مطابق پی ٹی آئی چیئرمین نے پشاور میں خیبر پختونخوا کے اراکین پارلیمنٹ سے خطاب کرتے ہوئے کہا ’میں 11 اگست کو وزارتِ عظمیٰ کا حلف لوں گا۔‘
عمران خان نے خطاب میں کہا کہ وہ خیبر پختونخوا کے وزیرِ اعلی کا فیصلہ بھی کر چکے ہیں، انھوں نے کہا ’آئندہ 48 گھنٹوں میں وزیرِ اعلیٰ کے نام کا اعلان کر دوں گا۔‘
تحریکِ انصاف کے چیئرمین کا کہنا تھا کہ کے پی وزیرِ اعلیٰ سے متعلق جو بھی فیصلہ کیا ہے وہ عوام کی بہتری کے لیے کیا ہے، انھوں نے واضح کیا ’وزارتِ اعلیٰ کے سلسلے میں کسی بلیک میلنگ میں نہیں آؤں گا۔‘
عمران خان نے اپنے خطاب میں سندھ کے حوالے سے بھی بات کی، ان کا کہنا تھا کہ اندرونِ سندھ کی پس ماندگی کا خاتمہ تحریکِ انصاف کی اولین ترجیح ہے۔
افغان صدر کا عمران خان کو ٹیلی فون، انتخابات میں کامیابی پر مبارک باد
بنی گالہ اجلاس: تحریکِ انصاف کا سب سے بڑی جماعت بننے کا دعویٰ
قبل ازیں وفاق، پنجاب اور خیبر پختونخوا میں حکومت سازی کے سلسلے میں بنی گالہ میں عمران خان کی صدارت میں اجلاس منعقد ہوا، اجلاس میں کہا گیا کہ تحریکِ انصاف پنجاب میں سب سے بڑی جماعت بن گئی ہے۔
اجلاس میں پی ٹی آئی ارکان نے پنجاب میں نمبر گیم پر عمران خان کو بریفنگ دی، ارکان کا کہنا تھا کہ پنجاب میں 134 ارکان ہوگئے ہیں، وہ آئندہ 3 روز میں حکومت بنانے کی پوزیشن میں ہوں گے۔
پی ٹی آئی چیئرمین عمران خان سے ملنے چوہدری پرویز الٰہی بھی اسلام آباد پہنچ گئے، بنی گالہ میں اجلاس کے بعد عمران خان کے پی اراکین پارلیمنٹ سے خطاب کے لیے پشاور چلے گئے۔
خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔
