لاہور: چیئرمین پاکستان تحریک انصاف عمران خان نے کہا ہے کہ پاکستان بنا تو اسلام کے نام پرتھا لیکن یہاں حکومتیں انسانیت کی خدمت کرنے سے عاری ہیں۔
عمران خان لاہورمیں خصوصی بچوں کے اسکول کی افتتاحی تقریب سے خطاب کررہے تھے۔
انہوں نے کہا کہ یہ کام تو حکومت کا تھا کہ خصوصی بچوں کی تعلیم و تربیت کا بندوبست کرتی اورانہیں بھی معاشرے کا کارآمد فرد بناتی لیکن جب کرپشن پہلی ترجیح ہو تو حکومتیں عوامی مفاد کے بجائے ذاتی مفادات کو اہمیت دیتی ہیں۔
چیئرمین عمران خان کا کہنا تھا کہ خصوصی بچوں کی دیکھ بھال اور تعلیم و تربیت سے متعلق فلاحی کام اللہ کی خوشنودی کے حصول کے جذبے کے تحت کیا گیا ہے اور اس طرح کا مشن بھی کوئی خاص انسان ہی شروع کرسکتا ہے۔
دوران خطاب عمران خان نے پاکستان میں شرح تعلیم کے اعداد و شمار کا ذکر کرتے ہوئے کہا کہ ڈھائی کروڑ بچے اسکولوں سے باہر اور پینتیس فیصد آبادی کو پوری طرح خوراک بھی میسر نہیں ہے حالانکہ یہ ملک اسلام کے نام پر حاصل کیا تھا جہاں ایک فلاحی معاشرے کی بنیاد رکھنی تھی۔
انہوں نے کہا کہ بد قسمتی سے حکمرانوں نے قیام پاکستان کے عظیم مقصد کو پس پشت ڈال کرذاتی مفادات کے حصول، مراعات اور اسٹیٹس کو بڑھاوا دیا جس کے لیے ملک میں کرپشن کو پروان چڑھایا گیا جس کے باعث ملک میں غریب آدمی غریب سے غریب تر اور امیر آدمی امیر سے امیر تربنتا جا رہا ہے۔
واضح رہے کہ اس تقریب سے پاکستان تحریک انصاف کے رہنما عبد العلیم خان نے بھی خطاب کیا اور اس طرح کے فلاحی کاموں میں بڑھ چڑھ کر حصہ لینے کی یقین دہانی کراتے ہوئے حکومت کو شدید تنقید کا نشانہ بنایا۔
