اسلام آباد : وزیراعظم عمران خان کا کہنا ہے بالآخر گورنر ہاؤس لاہور کے دروازے پاکستانی عوام پرکھل گئے، عوام حکمرانوں کو اپنائیں گے تو ہی ہم ایک ناقابل تسخیرقوم بنیں گے۔
تفصیلات کے مطابق وزیراعظم عمران خان نے سماجی رابطے کی ویب سائٹ ٹوئٹر پر اپنے پیغام میں کہا کہ بالآخر گورنر ہاؤس لاہور کے دروازے پاکستانی عوام پرکھل گئے، استعمار اور نوآبادیات کی نشانیاں ایک ایک کرکے زمین بوس ہو رہی ہیں، عوام حکمرانوں کو اپنائیں گے تو ہی ہم ایک ناقابل تسخیرقوم بنیں گے۔
Finally the doors of the Lahore Governor House open to the people of Pakistan. Symbols of colonial rule come crashing down. Our nation will become invincible when our people own their govt. pic.twitter.com/D5n9OseIjC
— Imran Khan (@ImranKhanPTI) September 17, 2018
گذشتہ روز وزیرِ اعظم عمران خان کی ہدایت پر گزشتہ روز گورنر ہاؤس پنجاب عوام کی سیر و تفریح کے لیے کھولا گیا تھا تاہم لاہور کے شہریوں نے غیر ذمہ داری کا مظاہرہ کرتے ہوئے اسے ایک ہی دن میں کچرے کے ڈھیر میں تبدیل کردیا تھا۔
مزید پڑھیں : گورنر ہاؤس پنجاب عوام کی سیر و تفریح کے لیے کھول دیا گیا
یاد رہے گورنر پنجاب چوہدری سرور نے گورنرہاؤس عوام کے لئے کھولنے کا اعلان کرتے ہوئے کہا تھا کہ گورنرہاؤس عوام کی ملکیت ہے، اب امیرغریب سے برابر ہیں، ناانصافی کے خلاف جہاد کریں گے۔
چوہدری سرور کا کہنا تھا کہ پاکستان اشرافیہ کے لئے نہیں20 کروڑعوام کے لئے بنایا گیا، ناانصافی کے خلاف جہاد جاری رہے گا، سرکاری عمارتیں ملک کا اثاثہ ہیں، احتساب پٹواری یا سپاہی کے بجائے اوپر کی سطح سے شروع ہوگا۔
خیال رہے کہ وزیرِ اعظم عمران خان کی ہدایت پر تمام صوبوں کے گورنر ہاؤس عوام کے لیے کھولے جا رہے ہیں، اس سلسلے میں اب تک سندھ، مری اور پنجاب کے گورنر ہاؤسز عوام کے لیے کھولے جا چکے ہیں۔
