اسلام آباد : چیئرمین تحریک انصاف عمران خان نے کہا ہے کہ میڈیا پر میری شادی کی خبر چلانا غیرذمہ دارانہ اورغیراخلاقی حرکت تھی، ایسی خاتون سے میرا رشتہ جوڑ اگیا جن کو جانتا تک نہیں، پی ٹی آئی نے پیمرا سے متعلقہ ٹی وی چینلز کے خلاف کارروائی کا مطالبہ کردیا۔

تفصیلات کے مطابق پی ٹی آئی نے میڈیا پر عمران خان کی تیسری شادی کی خبر نشر ہونے پر پیمرا سے رابطہ کرلیا، عمران خان نے ٹویئٹ کیا ہے کہ ان کی شادی کی جھوٹی خبریں پھیلانے والوں نے غیراخلاقی حرکت کی، اگر یہ حرکت برطانیہ میں ہوتی تو اس ادارے کا سربراہ گھرچلا جاتا۔

Imran Khan infuriated over marriage rumours by arynews

عمران خان نے مزید کہا کہ جن خواتین کی تصویریں دکھائی گئیں وہ ان سے کبھی ملے تک نہیں، ایسی گمراہ کن خبروں چلانے والوں کی غیرذمہ دارانہ حرکت اخلاقی تنزلی کی نشاندہی کرتی ہے۔

دوسری جانب کپتان کی شادی کی جھوٹی خبروں کےخلاف پی ٹی آئی نے پیمرا سے رابطہ کرلیا ہے۔  پیمرا کے نام درخواست میں کہا گیا ہے کہ کچھ چینلزنے گھنٹوں عمران خان کی تیسری شادی کی خبریں نشرکیں اورایک غیر متعلقہ خاتون سے ان کارشتہ جوڑا گیا۔

درخواست میں کہا گیا ہے کہ پی ٹی آئی چیئرمین کو اس وقت باقاعدہ منصوبے کے تحت نشانہ بنایا گیا جب وہ لندن میں بچوں کےساتھ وقت گذار رہے تھے۔

پیمرا سے درخواست کی گئی کہ عمران خان کی شہرت کو نقصان پہچانے والوں کے خلاف کارروائی کی جائے۔ یاد رہے کہ اس سے قبل لندن میں پی ٹی آئی ترجمان نےاس معاملے پرذمہ دارانہ صحافت پراے آروائی نیوز کی تعریف کی تھی۔