پشاور : پشاورہائی کورٹ میں چیئرمین پی ٹی آئی عمران خان کو نااہل قراردینےکےلئے دو الگ الگ درخواستیں دائر کردی گئیں۔
تفصیلات کے مطابق سابق وزیراعظم عمران خان کی مشکلات میں مزید اضافہ ہوگیا ، عمران خان کی نااہلی کیلئے پشاور ہائیکورٹ میں درخواستیں دائر کردی گئیں۔
ایک درخواست عوامی نیشنل پارٹی کے ایمل ولی خان نے دائر کی، جس میں عمران خان کو کاغذات نامزدگی میں اثاثے ظاہر نہ کرنے پر نااہل قرار دینے کی استدعا کی گئی ہے۔
درخواست میں مؤقف اختیار کیا کہ عمران خان نے این اے 45 کرم کے ضمنی الیکشن میں اثاثے ظاہر نہیں کیے، امیدوار کو کاغذات نامزدگی فارم میں تمام اثاثے ظاہر کرنا لازمی ہے، عمران خان نے اثاثے چھپائے جو الیکشن ایکٹ کی خلاف ورزی ہے۔
درخواست گزار نے استدعا کی کہ الیکشن کمیشن عمران خان کا بطور رکن قومی اسمبلی نوٹی فکیشن کالعدم قرار دے۔
عوامی نیشنل پارٹی کے ایمل ولی خان کی جانب سے درخواست میں الیکشن کمیشن ، اسپیکر قومی اسمبلی اورعمران خان کوفریق بنایا گیا ہے۔
دوسری درخواست جمیعت علماء اسلام نے درخواست دائر کی ، جے یو آئی رہنما احمد علی نے کامران مرتضی اور جلال الدین ایڈوکیٹ کی وساطت سے رٹ دائر کی، درخواست میں عمران خان کو سرکاری وعوامی عہدے کیلئے نااہل قرار دینے کی استدعا کی گئی ہے۔
درخواست مؤقف اختیار کیا کہ عمران خان صادق و امین نہیں رہے ، عمران خان نے دوران عدت بشرہ بی بی سے شادی کی، دوران عدت شادی غیرشرعی ہے۔
درخواست گزار کا کہنا تھا کہ عمران خان سے متعلق ریحام خان نے بھی اپنی کتاب بھی کئی انکشافات کئے ہیں، عمران خان نے جوا میں ملوث ہونے کا خود اعتراف کیا ہے اور سیاسی مقاصد کیلئے عمران خان نے سائفر کا جھوٹا بیانیہ بھی بنایا۔
درخواست میں کہا گیا کہ عمران خان بار بار اپنے بیانات پر یوٹرن بھی لیتا رہتا ہے، ان کے جھوٹے بیانیے کی وجہ سے فوج کے وقار کو بھی نقصان پہنچا، استدعا ہے کہ عمران کو نااہل قرار دیا جائے۔
