واشنگٹن: وزیراعظم عمران خان کی کیپٹل ہل آمد پر اراکین کانگریس نے شاندار استقبال کیا اور پاکستان کی قومی زبان اردو میں خوش آمدید کہا۔
تفصیلات کے مطابق وزیراعظم نے کیپٹل ہل میں کانگریس اراکین سے ملاقاتیں کیں، اس موقع پر وزیرخارجہ شاہ محمود قریشی بھی موجود تھے، جبکہ پاکستان کاکس شیلا جیکسن نے بھی عمران خان کا بھرپور استقبال کیا۔
اس موقع پر رکن کانگریس جم بینکس نے عمران خان کو مخاطب کرتے ہوئے کہا کہ وہ دہشت گردی کے خلاف پاکستان کی جدو جہد کو سراہتے ہیں۔
ان کا کہنا تھا کہ صدر ٹرمپ سے وزیراعظم عمران خان کی ملاقات مفید رہی، دہشت گردی کے خلاف پاکستان کی قربانیوں کو فراموش نہیں کیا جاسکتا۔
دریں اثنا امریکی رکن کانگریس تھامس سوزی نے کہا ہے کہ پاکستانی قوم نے دہشت گردی کے خلاف جنگ میں بہت قربانیاں دیں۔
ان کا کہنا تھا کہ پاکستان کو اپنے مغربی سرحد پر جن مشکلات کا سامنا ہے ہمیں ان کا اندازہ ہے۔ خیال رہے کہ تھامس سوزی نے اپنا خطاب السلام و علیکم سے شروع اور شکریہ کے ساتھ ختم کیا۔
آرمی چیف کا دورہ پینٹا گون، تاریخی استقبال، 21 توپوں کی سلامی
اس موقع پر امریکی ایوان نمائندگان کی اسپیکر نینسی پلوسی نے کہا ہے کہ پاکستان امریکا کیلئے بہت اہم ملک ہے، پاکستانی امریکن امریکا کی ترقی میں اہم کردار ادا کررہے ہیں۔
انہوں نے کہا کہ امریکا میں ڈاکٹرز کی بڑی تعداد کا تعلق پاکستان سے ہے، جنوبی ایشیا میں امن کیلئے پاکستان کی کوششوں کو سراہتے ہیں، دہشتگردی اور منی لانڈرنگ کے خلاف امریکا کو پاکستان کا تعاون حاصل ہے۔
پاکستان کاکس شیلا جیکسن کا کہنا تھا کہ پاکستان کی آبادی کا ساٹھ فیصد نوجوانوں پر مشتمل ہے، پاکستان میں امریکا کیلئے بہت مواقع ہیں، دونوں ملکوں کے درمیان تعلیم صحت اور دیگر کئی شعبوں میں تعاون کی گنجائش موجود ہے، امریکی انتظامیہ کو پاکستان سے تعلقات مزید مضبوط بنانے ہوں گے۔
