لاہور:چیئرمین تحریک انصاف عمران خان آج پارٹی رہنماؤں سے لانگ مارچ کے حوالے آئندہ کی حکمت عملی پر مشاورت کریں گے۔
تفصیلات کے مطابق تحریک انصاف کے لانگ مارچ کے دوسرے مرحلے کا ساتواں روز ہے، چیئرمین تحریک انصاف عمران خان زمان پارک میں موجود ہیں۔
عمران خان زمان پارک میں پارٹی رہنماؤں سے ملاقاتیں کریں گے، جس میں پارٹی رہنماؤں سےلانگ مارچ کے حوالے سے مشاورت کریں گے۔
جس کے بعد عمران خان 4 بجے کے بعد لانگ مارچ کے شرکا سے ویڈیو لنک پر خطاب بھی کریں گے۔
زمان پارک کے اطراف میں سیکورٹی کے سخت انتظامات کئے گئے ہیں ، عمران خان کی سیکورٹی کیلئےکے پی کے پولیس کے کمانڈوز رہائشگاہ کے اندر تعینات ہیں۔
سیکیورٹی کے پیش نظر رہائش گاہ کی کھڑکیوں پر بلٹ پروف شیشے لگا دیئے گئے ہیں اور رہائشگاہ کے اطراف میں سی سی ٹی وی کیمروں کی مدد سے نگرانی کی جا رہی ہے۔
گذشتہ روز حقیقی آزادی مارچ کے شرکا سے ویڈیو لنک کے ذریعے خطاب کرتے ہوئے عمران خان نے کہا تھا کہ مفرور، سزا یافتہ اور جھوٹا کیسے ملکی فیصلے کر سکتا ہے؟، ان کا ایک ہی مقصد ہےکہ کسی طرح عمران خان پر کیسز ختم کرکے راستے سے ہٹایا جائے۔
